Շենգեն գոտում չգտնվող երկրներից Լեհաստան ժամանողները պարտադիր կմեկուսանան
19:14, 23 Հունիս 2021
ԵՐԵՎԱՆ, 23 ՀՈՒՆԻՍԻ, ԱՐՄԵՆՊՐԵՍ: Լեհաստանի իշխանությունները որոշում են կայացրել վերադառնալ օրենքին, համաձայն որի՝ Շենգեն գոտուց դուրս գտնվող երկրներից այդ երկիր ժամանող անձինք կմեկուսանան: Ինչպես հաղորդում է «Արմենպրես»-ը, այս մասին մամուլի ասուլիսի ժամանակ հայտարարել է Լեհաստանի փոխարտգործնախարար Վալդեմար Կրասկան:
«Կարանտինը կսկսի գործել այսօր կեսգիշերից»,- հայտնել է նա՝ տեղեկացնելով, որ մեկուսացման շրջանը լինելու է 10 օր:
Կարանտինը կարող է չեղարկվել, եթե յոթ օր հետո ստացվի կորոնավիրուսի բացասական թեստի պատասխան:
Կրասկան տեղեկացրել է, որ նման քայլերի պատճառը աշխարհում կորոնավիրուսի նոր շտամերի արագ տարածումն է, մասնավորապես՝ «Դելտա» շտամի: Պարտադիր կարանտինի մասին որոշումը չի տարածվելու պատվաստվածների վրա:
Բաժանորդագրվեք մեր ալիքին Telegram-ում