Վարդենիս համայնքում իրականացվեց «Ավագանու նիստերի թափանցիկության ապահովում» ծրագիրը
ԳԱՎԱՌ, 18 ՀՈՒՆԻՍԻ, ԱՐՄԵՆՊՐԵՍ ։ Գեղարքունիքի մարզի Վարդենիս խոշորացված համայնքում իրականացվել է «Ավագանու նիստերի թափանցիկության ապահովում» ծրագիրը, որն ուղղված է ավագանու որոշումների կայացման գործընթացին քաղաքացիների իրազեկմանն ու մասնակցությանը։
Ինչպես «Արմենպրես»-ին տեղեկացրին Վարդենիսի համայնքապետարանի աշխատակազմից՝ ծրագրի միջոցով ստեղծվել է համայնքի ավագանու նիստերի հեռարձակման հնարավորություն: Ծրագրի շրջանակում ձեռք է բերվել ցանցային ուղիղ եթերների համար նախատեսված հեռակառավարվող մեկ տեսախցիկ, 9 խոսափող` համապատասխան սարքավորումներով, որոնք որպես նվիրատվություն հանձնվել են Վարդենիսի համայնքապետարանին: Դրամաշնորհը տրամադրել է ՀԿ կենտրոնը` «Աջակցություն դրամաշնորհների կառավարման գործընթացին կանանց հզորացման համար» ծրագրի շրջանակում, որը կյանքի է կոչում ՀԿ Կենտրոնը՝ Գերմանիայի միջազգային համագործակցության ընկերության (ԳՄՀԸ) կողմից իրականացվող «Լավ կառավարում հանուն տեղական զարգացման Հարավային Կովկասում» ծրագրի եւ ՄԱԿ-ի Զարգացման ծրագրի աջակցությամբ՝ Շվեյցարիայի եւ Գերմանիայի կառավարությունների կողմից համաֆինանսավորվող «Տեղական ինքնակառավարման համակարգի բարելավումը Հայաստանում» ծրագրի երկրորդ փուլի շրջանակում:
Դրամաշնորհային ծրագիրը Վարդենիս համայնքում համակարգել եւ իրականացրել է Աննա Գրիգորյանը: Ձեռք բերված գույքի ընդհանուր արժեքը կազմում է 500 000 դրամ, որից 400 000 դրամը տրամադրվել է որպես դրամաշնորհ, իսկ 100 000 դրամի չափով ներդրում է կատարել ծրագրի ղեկավարը:
Խոսրով Խլղաթյան
Բաժանորդագրվեք մեր ալիքին Telegram-ում