ԵՐԵՎԱՆ, 15 ՀՈՒՆԻՍԻ, ԱՐՄԵՆՊՐԵՍ: Ֆուտբոլի Եվրոպայի առաջնությունում պայքարը սկսեցին «մահվան խմբի»` F խմբի հավաքականները:

«Արմենպրես»-ի հաղորդմամբ`  Բուդապեշտի Ֆերենց Պուշկաշի անվան մարզադաշտում Եվրոպայի գործող չեմպիոն Պորտուգալիայի հավաքականը մրցեց Հունգարիայի դեմ: Առաջին կեսում Պորտուգալիան տիրել էր նախաձեռնությանը և հանդես էր գալիս «առաջին համարի» ներքո: Ըստ վիճակագրության Հունգարիան ընդամենը մեկ հարված էր կատարել դեպի դարպասը: Մի քանի սուր պահեր ուներ պորտուգալացիների առաջատար Կրիշտիանու Ռոնալդուն: Ի վերջո, թիմերն ընդմիջման գնացին զրոյական ոչ-ոքի հաշվով:

Երկրորդ կեսում հունգարները սկսեցին անհանգստացնել պորտուգալացի պաշտպաններին իրենց գրոհներով: Իսկ Պորտուգալիան այդպես էլ չէր կարողանում գտնել դեպի Հունգարիայի դարպասը տանող ճանապարհը: Հունգարիայի հավաքականին հաջողվեցգոլ խփել նաև 79-րդ րոպեին, բայց մրցավարները խաղից դուրս իրավիճակ գրանցեցին:

Պորտուգալիային հաջողվեց գրավել մրցակցի դարպասը 84-րդ րոպեին: Աչքի ընկավ Հերերուն: Այնուհետ` 87-րդ րոպեին նշանակված 11-մետրանոց հարվածն անվրեպ իրացրեց Կրիշտիանու Ռոնալդուն, որը դարձավ հերթական ռեկորդի հեղինակ՝ Եվրոպայի առաջնություններում խփելով 10-րդ գնդակը: Պորտուգալական ֆուտբոլի աստղը խփեց նաև երկրորդ գնդակը՝ գեղեցիկ գրոհից հետո արագ կողմնորոշվելով մրցակցի տուգանային հրապարակում:

Հունգարիա-Պորտուգալիա` 0:3:

Երկրորդ տուրում Պորտուգալիան հունիսի 19-ին կմրցի Գերմանիայի, իսկ Հունգարիան` Ֆրանսիայի հետ: