Ժամանակը Երևանում՝ 11:07:36,   31 Հուլիս

Ամենաթանկ բանն աշխարհում հայրենի տունն է. Ռաֆայել Սահակյանը գրողների հետ տոնեց իր հոբելյանը

Ամենաթանկ բանն աշխարհում հայրենի տունն է. Ռաֆայել Սահակյանը գրողների հետ 
տոնեց իր հոբելյանը

ԵՐԵՎԱՆ, 11 ՀՈՒՆԻՍԻ, ԱՐՄԵՆՊՐԵՍ:  Բանաստեղծ Ռաֆայել Սահակյանն իր 85-ամյա հոբելյանը տոնեց գրչակից ընկերների հետ հունիսի 11-ին Հայաստանի գրողների միությունում կազմակերպված ցերեկույթով:

«Սահակյանը 15 ժողովածուի հեղինակ է: Գրել է պոեզիա, արձակ, կենսագրականներ, վեպ Թաթուլ Կրպեյանի մասին, երկրի մասին: Նրա գործերը մարդկային են. գրում է  սիրով, անկեղծ, ջերմությամբ: Բնականությունը Սահակյանի ստեղծագործություններում բուրում է նոր թխած հացի պես»,- «Արմենպրես»-ի հաղորդմամբ՝ նշեց Գրողների միության նախագահ Էդվարդ Միլիտոնյանը:

Նա  շեշտեց, որ Սահակյանը բազմաթիվ պարգևներ և մրցանակներ ունի, բայց հարկ են համարում գրականությանը մատուցած ծառայության համար պատվոգիր նվիրել գրողին:

Սահակյանի մի քանի գրքի խմբագիր Տիգրան Նիկողոսյանն էլ ասաց, որ կարոտից ու ցավից են ծնվել Ռաֆայել Սահակյանի երկրի մասին պատմող գրերը: «Սահակյանը մեկն է այն քչերից, որն իր արձակ և չափածո գործում  վառ է պահում հայրենիքի թեման և դրա  լավագույն վկայությունն է «Կապույտ կանչ» վեպը, որի հերոսները, անցնելով ցավի ու տառապանքի միջով, հավատարիմ են մնում նախնյաց հիշատակին և իրենց նոր հայրենիքում տեր ու մշակ, Սարդարապատի գոյամարտի մասնակից և հուշահամալիր կառուցող դառնում»,-ընդգծեց Նիկողոսյանը:

Խոսելով «Էրգիրը տեսա հորս աչքերով», «Արծվապաշտ երկիր», «Արևի արցունքներ» գրքերի մասին՝ նա ասաց՝ գործերը փաստում են, որ Սահակյանն իր ժամանակի վկան ու տարեգիրն է:

Ռաֆայել Սահակյանին տարիքը չի վախեցնում, չի հուսահատեցնում: Նա նշեց՝ կա մի աշխարհ, որով  անցել է տասնամյակներ առաջ և հասկացել, որ ամենաթանկ բանն աշխարհում հայրենի տունն է, հողը, ծննդավայրը, ամենամեծ արժեքները ծնողներն են՝ հայրը, մայրը, հարազատներն են, որոնց լույսի, հոգու սքանչելիքով կերտում է իր օրը, կյանքը, բանաստեղծությունը, գիրը, որովհետև առանց այդ արժեքների գիրը կարող է կեղծ հնչել, առանց արմատներ, առանց հողի, առանց շնչառության:

Սահակյանի հայրը բռնագաղթվել է Արևմտյան Հայաստանից: Նա ընտանիքին է փոխանցել  սերն առ հայրենիք, և հեղինակը այդ կարոտը պահպանել է: Սահակյանի հայրը երազել է լինել իր ծննդավայրում, սակայն չի կարողացել, իսկ Ռաֆայել Սահակյանը երկու անգամ եղել է Արևմտյան Հայաստանում, որից հետո գրել է «Էրգիրը տեսա հորս աչքերով» գիրքը, որտեղ ներկայացրել է ամբողջ Արևմտյան Հայաստանը: «Հասկացա, որ իմ հոգու  պաթոսն առնչվում է մայրենի հողին, մարդուն, հայրենաձայնին: Բանաստեղծություններս հոգուս արժեքներն են, որոնք կարողացա ժամանակի  և տարածության մեջ հաղորդել մոտ 20 գրքով: Այդպես հասա բարձունքին, որը կոչվում է հոբելյան»,-նշեց գրողը:

Բանաստեղծը հիշեցրեց, որ  երկու գիրք է ստեղծել է՝ նվիրված  Արցախյան առաջին պատերազմի զոհերին, իսկ այժմ Արմավիրի մարզային «Հայրենականչ» թերթում ներկայացնում է Արցախյան 44-օրյա պատերազմի զոհերին՝ փորձելով մեղմել նրանց ծնողների տիեզերական վիշտը: «Ցավ է ինձ համար, որ մեր օրերում այսքան զոհ ունենք, որոնց ասես մոռանում ենք: Չգիտեմ, թե մեր ժողովուրդը երբ պետք է հասունանա, հզորանա, երբ պետք է գան անհատներ, որոնք տեր կկանգնեն ժողովրդին, կհասկանան, թե ինչպես կորցրին ու ինչպես է հնարավոր հետ բերել կորցրածը»,-եզրափակեց Ռաֆայել Սահակյանը:

Ռաֆայել Սահակյանը ծնվել է 1936 թվականին Թալինի շրջանի Միջնաձոր գյուղում։ Ավարտել է Երևանի Խաչատուր Աբովյանի անվան պետական մանկավարժական ինստիտուտի բանասիրական ֆակուլտետը։ Եղել է Արմավիրի գործկոմի կրթության բաժնի հայոց լեզվի և գրականության տեսուչը, ապա՝ կրթության, մշակույթի և սպորտի վարչության պետը։

Դասավանդել է Մեծամորի «Արմավիր» համալսարանում։ Աշխատել է Սարդարապատ ազգագրական թանգարանում: Ռաֆայել Սահակյանի սցենարով ստեղծվել է փաստավավերագրական տեսաֆիլմ՝ նվիրված Սարդարապատի 80-ամյակին և Արցախի հերոսամարտին։ Բանաստեղծությունները պարբերաբար տպագրվել են գրական մամուլում։ Արմավիրի մարզային «Հայրենականչ» թերթի գլխավոր խմբագիրն է։ Հեղինակ է չափածո և արձակ 15 ժողովածուի:

Անժելա Համբարձումյան








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]