ԵՐԵՎԱՆ, 10 ՀՈՒՆԻՍԻ, ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ/ԱՐՄԵՆՊՐԵՍ: 1921 թ. հունիսի 10-ին ծնվել է արքայազն Ֆիլիպը՝ Մեծ Բրիտանիայի թագուհի Եղիսաբեթ 2-րդի ամուսինը:

-1878 թ. հունիսի 10-ին ծնվել է Արտեմ Բերոյանը՝ հայ խորհրդային դերասան, Վրացական ԽՍՀ ժողովրդական արտիստ (1941)։ Եղել է Թիֆլիսի Հայ դրամայի առաջին դերասաններից մեկը (1922)։ 1909 թ. Աբելյան-Արմենյան խմբի հետ հանդես է եկել Կոստանդնուպոլսում։ Հանդես է եկել նաեւ Երեւանի հեղափոխական թատրոնում:

-1895 թ. հունիսի 10-ին ծնվել է Սուրեն Ստեփանյանը՝ հայ քանդակագործ, մանկավարժ, արվեստի տեսաբան։ ՀԽՍՀ ժողովրդական նկարիչ (1950)։ Հայ քանդակագործ Արմենակ Ստեփանյանի եղբայրը:

-1898 թ. հունիսի 10-ին ծնվել է Գուրգեն Վանանդեցին՝ հայ գրականագետ, քննադատ։

-1903 թ. հունիսի 10-ին ծնվել է Համո Յոլյանը՝ հայ սովետական պետական եւ ռազմական գործիչ, ինժեներահրետանային ծառայության գեներալ-մայոր (1944), սոցիալիստական աշխատանքի հերոս (1942)։ ԽՍՀՄ պետական մրցանակի քառակի դափնեկիր։

-1930 թ. հունիսի 10-ին ծնվել է Նիկոլայ Հովհաննիսյանը՝ հայ պատմաբան, արեւելագետ։ Պատմական գիտությունների դոկտոր (1968), պրոֆեսոր (1971)։

-1936 թ. հունիսի 10-ին ծնվել է Ռազմիկ Մանուկյանը՝ ճարտարապետ, 1966-1970 թթ.՝ Երեւանի Մյասնիկյանի շրջանի գլխավոր ճարտարապետ, 1985-1990 թթ.՝ «Երեւան նախագիծ» ինստիտուտի ճարտարապետության արվեստանոցի ղեկավար:

-1941 թ. հունիսի 10-ին ծնվել է Ժենյա Ավետիսյանը՝ թատրոնի, հեռուստատեսության եւ կինոյի հայ դերասանուհի, ասմունքող, ՀԽՍՀ վաստակավոր եւ ՀՀ ժողովրդական արտիստ:

-1947 թ. հունիսի 10-ին ծնվել է Ռուբեն Անղալադյանը՝ հայ բանաստեղծ, թարգմանիչ, մշակութաբան, փիլիսոփա, ՀՀ մշակույթի վաստակավոր գործիչ:

-1954 թ. հունիսի 10-ին ծնվել է Սիլվա Յուզբաշյանը՝ դերասանուհի:

-1959 թ. հունիսի 10-ին ծնվել է Արիս Արսենին՝ հայ բանաստեղծ, արձակագիր, մանկագիր, երգիծաբան, լրագրող, ազատամարտիկ:

Ա. Հ.