Դատախազությունը տնտեսել ու պետբյուջե է փոխանցել 75 միլիոն դրամ
ԵՐԵՎԱՆ, 4 ՀՈՒՆԻՍԻ, ԱՐՄԵՆՊՐԵՍ: Դատախազության բոլոր ծրագրերի իրականացման համար 2020 թվականին նախատեսվել էր 5 միլիարդ 438 միլիոն դրամ, որից 75 միլիոն դրամը տնտեսվել և փոխանցվել է պետական բյուջե: «Արմենպրես»-ի հաղորդմամբ՝ այս մասին ասաց Գլխավոր դատախազության գլխավոր քարտուղար Համայակ Նավասարդյանը՝ ներկայացնելով 2020 թվականի պետական բյուջեի կատարման վերաբերյալ հաշվետվությունը:
«Բյուջեի ծախսը կազմել է 5 միլիարդ 407 միլիոն կամ կատարողականի 99 տոկոսը: Տնտեսումը կազմել է 75 միլիոն 131 հազար դրամ: Միաժամանակ, հարկ եմ համարում նշել, որ ընդհանուր առմամբ բացի 75 միլիոնի տնտեսումից, որը վերադարձվել է պետական բյուջե, Դատախազության կողմից Զինծառայողների ապահովագրության հիմնադրամին փոխանցվել է 141 միլիոն 150 հազար դրամ և դատախազության պահուստային ֆոնդից 10 միլիոն դրամ աջակցություն է տրամադրվել կորոնավիրուսի դեմ պայքարի շրջանակներում»,- ասաց Նավասարդյանը:
Բաժանորդագրվեք մեր ալիքին Telegram-ում