Ժամանակը Երևանում՝ 11:07:36,   18 Հունիս

«Շախմատ հանուն ազատության» դեմո մրցաշարին մասնակցեց նաև Հայաստանի թիմը և գրավեց երրորդ տեղը

«Շախմատ հանուն ազատության» դեմո մրցաշարին մասնակցեց նաև Հայաստանի 
թիմը 
և գրավեց երրորդ տեղը

ԵՐԵՎԱՆ, 11 ՄԱՅԻՍԻ, ԱՐՄԵՆՊՐԵՍ: Շախմատի միջազգային ֆեդերացիայի (ՖԻԴԵ) և Կուկի շրջանի շերիֆի գրասենյակի (Չիկագո, ԱՄՆ) կողմից ձեռնարկված «Շախմատ հանուն ազատության» միջոցառման շրջանակներում Հայաստանի, Ռուսաստանի, Իսպանիայի և ԱՄՆ-ի ազատազրկման մեջ գտնվող անձինք մրցեցին առցանց դեմո շախմատում:

Լուսանկարները՝ Հայկ Մանուկյանի

«Արմենպրես»-ի հաղորդմամբ` մինչ մրցաշարի մեկնարկը Հայաստանի շախմատի ֆեդերացիայի փոխնախագահ Սմբատ Լպուտյանը շեշտեց, որ մեկ ամսից ավել է, ինչ սկսվել են աշխատանքները քրեակատարողական հիմնարկներում շախմատի ուսուցման և մասսայականացման ուղղությամբ: «Հավաքական թիմն ընտրվել է քրեակատարողական հիմնարկներում անցկացված մրցաշարերի արդյունքում, իսկ 6 լավագույններն ընդգրկվել են հավաքականում»,-ասաց նա:

ՀՀ Արդարադատության նախարարի տեղակալ Արմեն Հովհաննիսյանի խոսքով` նախարարությունը մեծապես կարևորում է համանման միջոցառումների իրագործումը: «Շախմատն այն մարզաձևերից է, որը նպաստում է անձի ինտելեկտի, ստեղծարար մտքի զարգացմանը: Այս հանգամանքը հատկապես կարևորվում է դատապարտյալների շրջանում»,-ասաց Հովհաննիսյանը:

Քրեակատարողական ծառայության պետի առաջին տեղակալ Արտակ Հարությունյանն առանձնացրեց, որ շախմատը քրեակատարողական հիմնարկներում ունի վարակիչ, մոտիվացնող դրսևորում: «Տարեցտարի ավելի շատ դատապարտյալներ են մասնակցում շախմատային ներքին մրցաշարերին: Կարծում եմ, որ ոչ միայն շախմատը, այլ նաև նման հավաքական միջոցառումները իրենց ուրույն դերակատարումն ունեն վերաինտեգրման ասպարեզում»,-մեջբերեց նա:

Առցանց դեմո մրցաշարում Հայաստանի թիմը Իսպանիայի հետ մրցախաղն ավարտեց ոչ-ոքի (2:2), պարտվեց Ռուսաստանին 4:0 և ԱՄՆ-ին` 3:1 հաշվով: Առաջին տեղում Ռուսաստանի թիմն է, երկրորդը` ԱՄՆ, իսկ եռյակը եզրափակում է Հայաստանը: Իսպանիայի 4-րդն է:

Շախմատի միջազգային ֆեդերացիայի (ՖԻԴԵ) և Կուկի շրջանի շերիֆի գրասենյակի (Չիկագո, ԱՄՆ) կողմից ձեռնարկված «Շախմատ հանուն ազատության» ծրագրի նպատակն է շախմատի ներդրումը որպես տարբեր երկրների բանտերում կրթության և սոցիալական ներառման գործիք։ Նախագիծն իրականացվում է աշխարհի 12-րդ չեմպիոն Անատոլի Կարպովի հովանու ներքո: Ընթացիկ տարվա հոկտեմբերի 13-14-ը անցկացվելիք «Բանտարկյալների համար միջմայրցամաքային շախմատի առցանց առաջնությունը», որին կմասնակցի նաև Հայաստանի թիմը: «Արմավիր» ՔԿՀ-ում կայացած շախմատի առաջնության արդյունքում դատապարտյալներից ընտրվել են հինգ լավագույն խաղացողները՝ Շախմատի համաշխարհային առցանց կոնֆերանսին Հայաստանը ներկայացնելու համար։

 

 








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ