Այս ողբերգության ցավը շատ խորն է. ԱՄՆ կոնգրեսականը Հայոց ցեղասպանության տարելիցին ուղերձ է հղել
ԵՐԵՎԱՆ, 23 ԱՊՐԻԼԻ, ԱՐՄԵՆՊՐԵՍ: ԱՄՆ կոնգրեսական, Հայկական հարցերի կոնգրեսական հանձնախմբի համանախագահ Դեյվիդ Վալադաոն պատիվ է համարում Կոնգրեսում հայերի համար աշխատելը և բարձրացնելը հարցեր, որոնք հուզում են տեղի հայկական համայնքին: Այս մասին նա խոսել է Հայոց ցեղասպանության 106-րդ տարելիցին «Արմենպրես»-ին տրամադրած ուղերձում:
«Այսօր լրանում է Հայոց ցեղասպանության 106-րդ տարելիցը: 1.5 մլն հայեր սպանվեցին և տեղահանվեցին Օսմանյան կայսրության կողմից 1915-1923 թվականների ընթացքում, որը համարվում է 20-րդ դարի առաջին ցեղասպանությունը:
Այս ողբերգության ցավը շատ խորն է: Շատ հայեր, ովքեր տեղահանվեցին իրենց տներից, եկան Միացյալ Նահանգներ՝ ստեղծելով ԱՄՆ-ի հպարտ ու արժանապատիվ հայկական համայնքը:
Որպես ամերիկացիներ՝ հավատացած եմ, որ հատուկ պատասխանատվություն ունենք՝ ճանաչելու այն տառապանքները, որոնք զգացել են այդ ընտանիքները: Այսօր՝ Հայոց ցեղասպանության հիշատակի օրը, մենք հիշում ենք հայ տղամարդկանց, կանանց և երեխաներին, ում կյանքը կամ կորսվեց, կամ հավերժ փոխվեց»,- մասնավորապես ասվում է Վալադաոի տեսաուղերձում:
Բաժանորդագրվեք մեր ալիքին Telegram-ում