ԵՐԵՎԱՆ, 24 ԱՊՐԻԼԻ, ԱՐՄԵՆՊՐԵՍ: Ռուսաստանաբնակ կինոռեժիսոր և պրոդյուսեր Սարիկ Անդրեասյանը Հայոց ցեղասպանության 106-րդ տարելիցին «Ինստագրամի» իր պաշտոնական էջում Հայաստանի մասին պատմող կարճ ֆիլմ է հրապարակել:

«Մեր թիմն այս հոլովակը պատրաստել էր դեռևս մեկ տարի առաջ: Կարծում եմ՝ դժվար է գտնել ինչ-որ բան, որն առավել լավ կներկայացնի մեր հրաշալի ժողովրդին և հայրենիքը: Թող միշտ խաղաղություն լինի, և ամենավատ բաները թող անցյալում մնան: Անհրաժեշտ է նայել դեպի ներկան և ապագան՝ մեծ հարգանք տածելով հզոր նախնիների և անցյալի հանդեպ: Հավերժ փառք ցեղասպանության միլիոնավոր զոհերին»,-«Արմենպրես»-ի հաղորդմամբ՝ ֆիլմին կից  գրել է կինոռեժիսորը:

Նրա խոսքով՝ անհրաժեշտ է ուժեղ, համախմբված և կրթված լինել: «Մեր ապագան մեր ձեռքերում է»,-եզրափակել է Անդրեասյանը:

Օսմանյան կայսրության կողմից 1915 թվականին հայերի նկատմամբ իրականացված ցեղասպանությունը 20-րդ դարասկզբի մեծագույն ոճրագործությունն է: Աշխարհասփյուռ հայությունը նշում է Հայոց ցեղասպանության 106-րդ տարելիցը: Ցեղասպանությունը ճանաչել և դատապարտել են մոտ երեք տասնյակ պետություն:

View this post on Instagram

A post shared by Sarik Andreasyan (@sarik_andreasyan)