Ժամանակը Երևանում՝ 11:07:36,   15 Հունիս

Ժաննա Անդրեասյանը հայտնել է ԵՊՀ հոգաբարձուների խորհրդում ընդգրկված անդամների կազմից դուրս գալու պատճառները  

Ժաննա Անդրեասյանը հայտնել է ԵՊՀ հոգաբարձուների խորհրդում ընդգրկված 
անդամների կազմից դուրս գալու պատճառները

 

ԵՐԵՎԱՆ, 14 ԱՊՐԻԼԻ, ԱՐՄԵՆՊՐԵՍ: ՀՀ կրթության, գիտության, մշակույթի և սպորտի նախարարության կողմից ԵՊՀ հոգաբարձուների խորհրդի կազմում ընդգրկված անդամները հայտնել են խորհրդի կազմից դուրս գալու մասին:

«Արմենպրես»-ի հաղորդմամբ՝ ապրիլի 14-ին լրագրողների հետ հանդիպմանը ներկայացնելով նման որոշման պատճառները՝ խորհրդի անդամ Ժաննա Անդրեասյանը շեշտեց, որ իրենք ինչպես կարգն է ծանուցվել են հունվարի 29-ի հոգաբարձուների խորհրդի նիստի օրակարգի և նյութերի մասին: Ինչպես ընդունված է, իրենց ուղարկվել են նաև խորհրդի որոշման նախագծերը:

«Հենց առաջին հարցը, որը դրվեց հունվարի 29-ի նիստի քննարկմանը, հոգաբարձուների խորհրդի աշխատակարգում փոփոխություններ կատարելու մասին  էր: Մեզ ուղարկվել էր մի տարբերակ, որում առաջարկվել էր աշխատակարգում ավելացնել կետ, որով ձևակերպվում էր, որ խորհրդի նախագահի բացակայության պայմաններում խորհրդի քարտուղարը, եթե տվյալ բուհում սովորող չէ, ժամանակավորապես ստանձնում է նախագահի լիազորությունները մինչև խորհրդի հաջորդ նիստում նախագահի ընտրության մասին որոշման կայացումը: Ե՛վ նախագահի, և՛ քարտուղարի բացակայության պայմաններում խորհրդի նախագահի լիազորությունները  խորհրդի առաջին նիստի իրավական հիմքով իրականացնում է տարիքով ավագ անդամը, իսկ քարտուղարությունն իրականացնում է կրտսեր անդամը: Երբ քննարկում ծավալվեց այս կետի շուրջ, այստեղ հիմնական հիմնավորումն այն էր, որ առկա է իրավական բաց, և խորհրդի նախագահի պաշտոնի թափուր լինելու պայմաններում հստակ կանոնակարգում չկա, թե ով պետք է հրավիրի նիստը և նախագահի այն: Աշխատակարգի այս փոփոխությունը ներկայացված է, որպեսզի մենք չունենանք իրավական խնդիր, և եթե խորհրդի նախագահ չընտրվի,  կունենանք իրավական հստակ կարգավորում հաջորդ նիստը հրավիրելու խորհրդի նախագահի ընտրության թեմայով»,-պատմեց Անդրեասյանը:

Նա նշեց՝ երբ ավարտվել է հարցի քննարկումը, և անցել են քվերակությանը, որևէ անդրադարձ չի եղել այն դիտարկմանը, որ քարտուղարը ժամանակավորապես ստանձնում է նախագահի լիազորությունները մինչև խորհրդի հաջորդ նիստում նախագահի ընտրության մասին որոշման կայացումը:

Երբ խորհրդի անդամները ծանուցվել են ապրիլի 1-ի նիստի մասին, օրակարգի հետ կապված հարցեր են առաջացել, քանի որ օրակարգում ներառված չի եղել խորհրդի նախագահի ընտրության մասին հարցը: «Փորձեցինք գտնել  խորհրդի նախորդ նիստի արդյունքում կայացված որոշումները: ԵՊՀ կայքի հոգաբարձուների խորհրդի բաժնում փաստաթղթերի տեղակայման հատվածում զետեղված են հունվարի 29-ի որոշումները: Երբ ծանոթանում ենք աշխատակարգում տեղի ունեցած փոփոխությանը, տեսնում ենք, որ ձևակերպումը չի համապատասխանում խորհրդի կողմից  քննարկված և քվեարկված որոշմանը»,- շեշտեց Անդրեասյանը:

Փոխնախարարի խոսքով՝ այդ որոշումն ինկորպորացվել է նաև աշխատակարգում և տեղադրված է համալսարանի փաստաթղթերի բաժնում՝ աշխատակարգի տեսքով:

«Հունվարի 29-ի որոշումներին ծանոթանալով՝ տեսանք, որ նիստում կայացվել է խորհրդի նախագահի քվերակություն, և որևէ մեկը չի ընտրվել: Ներկայացվում են քվերակության արդյունքներն ու այլ կետում նշվում է, որ ԵՊՀ հիմնադրամի հոգաբարձուների խորհրդի նախագահի լիազորությունների կատարումը խորհուրդը որոշել է նիստի ավարտից հետո ժամանակավորապես հանձնարարել խորհրդի քարտուղարին, մինչև խորհրդի կողմից նախագահի ընտրության մասին որոշման կայացումը: Նախ՝ ուզում եմ ևս մեկ անգամ շեշտել, որ այստեղ օգտագործված  «մինչև խորհրդի կողմից նախագահի ընտրության մասին որոշման կայացում» ձևակերպումը կրկնում է աշխատակարգում ներկայացված այն փոփոխությունը, որի համար չենք քվերակել, և որը չի ընդունվել: Այն որոշումը, որը ներկայացված է, քվեարկված չէ, հաստատված չէ խորհրդի կողմից»,- ընդգծեց նա ու հավելեց՝ երբ որպես խորհրդի անդամներ մասնակցում են նիստի, ինչից հետո հայտնաբերում, որ խորհրդի  ընթացքում տեղի ունեցած քննարկումները, կայացված որոշումները խեղաթյուրվում են, առնվազն վստահություն չունեն նման խորհրդում տեղի ունեցող գործընթացների նկատմամաբ:

Խորհրդի կազմը լքած անդամները կարծում են, որ կառուցողական մթնոլորտի կարիք կա: Անհրաժեշտ են համարում ձևավորել բուհի զարգացման, խնդիրների մասին խոսող, քննարկող և դրանցով իրապես մտահոգ խորհուրդ, որը կառուցված կլինի վստահության հիման վրա:

ԵՊՀ հոգաբարձուների խորհրդի կազմից դուրս գալու հայտ են ներկայացրել ՀՀ ԿԳՄՍ նախարարի տեղակալներ Արթուր Մարտիրոսյանը, Ժաննա Անդրեասյանը, Գիտության կոմիտեի նախագահ Սարգիս Հայոցյանը և Երիտասարդական քաղաքականության, լրացուցիչ և շարունակական կրթության վարչության պետ Գոհար Մամիկոնյանը:








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ