ԵՐԵՎԱՆ, 12 ԱՊՐԻԼԻ, ԱՐՄԵՆՊՐԵՍ:  ՀՀ արտակարգ իրավիճակների նախարարությունը ընթացիկ տարում ծավալուն միջոցառումներ է նախատեսում քաղաքացիական պաշտպանության ուղղությամբ: Վերջին պատերազմից քաղած դասերը, դրա հետևանքով վերհանված բացերն իրենց տեղն են գտնում նախատեսված աշխատանքներում: ՀՀ արտակարգ իրավիճակների նախարարի առաջին տեղակալ Արմեն Փամբուխչյանը «Արմենպրես»-ի հետ զրույցում, ներկայացնելով արված աշխատանքն ու առաջիկա անելիքները, նշեց, որ  մեծաթիվ  միջոցառումներ են նախատեսված քաղաքացիական պաշտպանության ոլորտում հասարակության իրազեկվածության մակարդակը բարձրացնելու ուղղությամբ: Մասնավորապես, ըստ նրա, այդ աշխատանքներում հիմնարար կարող են համարել այն, որ մշակվել է Բնակչության պատսպարման մասին հայեցակարգ, որը նախկինում չի եղել: 

«Այս հայեցակարգի միջոցով մենք ունենալու ենք օրենսդրական հիմքեր, չափորոշիչներ ապաստարանների, պատսպարման վայրերի, թաքստոցների քաղաքաշինական նորմերի և այլ հարցերի հետ կապված: Հայեցակարգը մշակվել է, ներկայացվել է հանրային քննարկման, առաջիկայում նախատեսում ենք ներկայացնել կառավարության քննարկմանը»,-ասաց փոխնախարարը: 

Նախարարության ուշադրության կենտրոնում է ժամանակավոր պատսպարանների հարցը: Արմեն Փամբուխչյանը նշեց, որ ԱԻՆ-ը համայնքներից շաբաթական ռեժիմով ստանում է պատսպարանների,  թաքստոցների պայմանների մասին տեղեկություն, որից հետ  մասնագետները գնում տեղում ուսումնասիրություններ են կատարում՝ տեսնելու, թե ինչ վիճակում են դրանք, ինչ խնդիրներ ու բացեր կան: Խոսքը ոչ միայն պատսպարանների մասին է, այլև պաշտպանական մյուս կառույցների, օրինակ հակաճառագայթային և պարզագույն: Ներկայում լայնամասշտաբ գործողություններ են իրականացնում գույքագրման ուղղությամբ: Նախարարությունը դաշտն ամբողջությամբ ուսումնասիրելու, խնդիրները վերհանելու փուլում է:   

«Մենք ունենք խնդիր հիմնականում շենքերի նկուղային հատվածների հետ կապված, որոնք կարող են ծառայել որպես կարճաժամկետ թաքստոցներ: Դրանք ժամանակի ընթացքում մասնավորեցվել են: Ու ունենք դեպքեր, երբ մասնավորեցված տարածքի բանալին գտնվում է սեփականատիրոջ մոտ, ով երկրում չէ: Դրանից բացի, նկուղային հատվածը մասնավորեցված է, սակայն բաց, հասանելի չէ, որ քաղաքացիներն անհրաժեշտության դեպքում պատսպարվեն: Սա թերևս հիմնական խնդիրն է: Կարող եմ նշել նաև այն, որ ապաստարաններում տևական ժամանակ չեն կատարվել վերանորոգման աշխատանքներ և նրանք գտնվում են ոչ պիտանի վիճակում: Օրինակ, ջրով են լցված, աղբակույտեր են, օդափոխության համակարգը չի աշխատում, այսինքն` անհրաժեշտ կահավորում, պայմաններ չկան: Մյուս խնդիրն այն է, որ ապաստարանների վրա կամ դրանց կից շինարարություն է կատարվել: 

«Սրանք և այլ խնդիրներն այս ընթացքում վերհանվել են, արձանագրվել ու դրանց ուղությամբ աշխատանք ենք տանում: Ասեմ նաև, որ մշակված նոր հայեցակարգով սահմանվելու են քաղաքաշինական հստակ մոտեցումներ: ԱԻՆ, համայնքներ, Քաղաքաշինության կոմիտե համագործակցությամբ ուշադրության կենտրոնում են պահվելու նաև նոր ապաստարանների, պատսպարանների  կառուցման աշխատանքները, իհարկե, տեղի նպատակահարմարությունը պետք է որոշվի համատեղ»,-ասաց Արմեն Փամբուխչյանը:

Անդրադառնալով տեխնիկական համալրման աշխատանքներին, մասնավորապես անվտանգության շչակների համալրմանը՝ փոխնախարարը նշեց, որ այս ծրագրերը նույնպես ընթացքում են: Մարզային փրկարար ծառայության ղեկավար կազմի զեկույցների համաձայն, տարբեր համայնքների կողմից ձեռք են բերվում նոր անվտանգության շչակներ: Այս ընթացքում բավական քանակի շչակներ նորացվել են, սակայն դեռ գործընթացը շարունակվում է: Այժմ աշխատանք է տարվում այն ուղղությամբ, որ այդ բոլոր շչակները կենտրոնացված գործեն, այսինքն՝ ազադարարումը կառավարվի մեկ տեղից:  

Այս տարի նախարարությունը սկսել է նաև ուսումնական վարժանքների ծրագիրը, որն իրականացվում է բոլոր մարզերում: Առաջին եռամսյակում ՀՀ ամբողջ տարածքում իրականացվել է 150 ուսումնական վարժանք: Միայն երկրաշարժի ժամանակ անվտանգության հարցերի  ուղղվածությամբ իրականացված վարժանքների շրջանակում ուսուցանվել է 4 հազար 762 քաղաքացի: Աշխատանքներն իրականացվել են թե պլանային, թե արտապլանային ծրագրերով: Փոխնախարարն ընդգծեց, որ վարժանքներին մասնակցելու պատրաստակամությունը շատ դեպքերում գալիս է հենց համայնքներից, կազմակերպություններից: 

«Մենք ամեն ինչ անում ենք, որ  հնարավորինս շատ կազմակերպություններ, հաստատություններ ներգրավվեն: Ինչ վերաբերում է բազմաբնակարան բնակելի շենքերին, եթե ցանկություն կա, ապա կարող են դիմել իրենց վարչական շրջան, համատիրություն և տվյալ տարածքի փրկարար ծառայությունը պատրաստ է արձագանքել, աջակցել, այստեղ խնդիր չենք տեսնում»,-ասաց նա:  

Վարժանքներն անցկացվում են տարբեր ուղղություններով՝ ինչպես պատսպարվել, առաջին բուժօգնություն, տարահանում, ինչ վարքագիծ դրսևորել տարբեր արտակարգ իրավիճակներում: Ուշադրություն են դարձվում շինությունների ենթակառուցվածքներին, մատնանշվում են այն խնդիրները, որոնք պետք է շտկվեն: 

Պատերազմից քաղած դասերը տեղ են գտնում ուսումնական և իրազեկման գործընթացներում: Խնդիր է դրված բարձրացնել հանրության իրազեկվածության մակարդակը ռազմական գործողությունների իրականացմամբ պայմանավորված կամ դրանց հետևանքներից առաջած վտանգների, տարերային կամ տեխնածին բնույթի աղետների, արտակարգ իրավիճակների դեպքում: 

Աննա Գզիրյան