ԵՐԵՎԱՆ, 31 ՄԱՐՏԻ, ԱՐՄԵՆՊՐԵՍ:  Շվեդիայում կորոնավիրուսի դեմ սահմանափակումների թուլացումը հետաձգվելու է առնվազն մինչև մայիսի 3-ը, սակայն ավելի խիստ միջոցների ձեռնարկման անհրաժեշտություն այս պահին չկա: Ինչպես հաղորդում է «Արմենպրես»-ը, այս մասին հայտնում է Reuters-ը:

Կառավարությունն ավելի վաղ որոշել էր, որ Զատկից հետո որոշ կանոններ կդյուրացվեն, մասնավորապես կթույլատրվի ավելի մեծ թվով այցելուների մուտքը զվարճանքների այգիներ, համերգներ, ֆուտբոլային հանդիպումների: Սակայն Առողջապահության գրասենյակը խորհուրդ է տվել կասեցնել այդ քայլը, քանի որ վարակման դեպքերի աճ է գրանցվել:

«Մենք ստանում ենք տեղեկություններ առողջապահության ոլորտում լարված իրավիճակի մասին: Որոշ շրջաններում վարակը տարածվում է դրամատիկորեն»,- ասել է գրասենյակի տնօրեն Յոհան Կարլսոնը:

Կորոնավիրուսի հետևանքով 10 մլն բնակչություն ունեցող Շվեդիայում ընդհանուր առմամբ մահացել է ավելի քան 13 հազար մարդ: