Պատգամավորը Բարձրագույն կրթության և գիտության մասին օրենքի նախագիծը բավարար համարձակ չի համարում
ԵՐԵՎԱՆ, 4 ՄԱՐՏԻ, ԱՐՄԵՆՊՐԵՍ: ՀՀ ազգային ժողովի «Իմ քայլը» խմբակցության պատգամավոր Գևորգ Պապոյանը համարում է, որ «Բարձրագույն կրթության և գիտության մասին» և 22 այլ օրենքներում լրացումներ և փոփոխություններ նախատեսող օրինագծերի փաթեթը բավարար համարձակ չէ: «Արմենպրես»-ի հաղորդմամբ՝ Պապոյանը նման տեսակետ հայտնեց նախագծի երկրորդ ընթերցմամբ քննարկմանը:
«Իմ կարծիքով՝ նախագիծը բավարար համարձակ չէ: Տարատեսակ լոբբիստական շրջանակներ իրենց բավարար ազդեցությունն ունեցել են, որպեսզի նախարարությունը չգնա համարձակ քայլերի: Սակայն նախագիծը մի քանի քայլ առաջարկ է»,-ասաց Պապոյանը:
Նա շեշտեց, որ բուհի ամենակարևոր դեմքերը պրոֆեսորներն են, դոցենտները: Պատգամավորը նկատեց, որ դոցենտներին, պրոֆեսորներին, ասիստենտներին ընտրում է ակադեմիական խորհուրդը: «Իմ խորին համոզմամբ՝ խիստ քաղաքականացված է ակադեմիական խորհուրդը, քանի որ ակադեմիական խորհուրդներում մասնաբաժիններ ունեն տարբեր խմբեր: Եվ այդ խմբերից մեկը գոնե մինչև այս պահի դրությամբ խիստ քաղաքականացված է»,-ասաց Պապոյանն ու կարծիք հայտնեց, որ բուհերը դեռևս քաղաքականությունից զերծ պահել չի հաջողվել:
Նա նշեց՝ բուհերի դասախոսներն ազատ են տարբեր քաղաքական հայացքներ ունենալու և արտահայտելու հարցում, սակայն ցավալի հավելեց, որ բուհերում ակադեմիական խորհուրդներում դեռևս կան խմբեր, որոնք շարունակում են սպասարկել ինչ-որ շահեր, ընդ որում քաղաքական կոնկրետ շահեր: Նա հույս հայտնեց, որ մի օր էլ ավելի համարձակ նախագիծ կներկայացվի:
Ըստ օրինագծի՝ օրինակ ռեկտորը պետք է ընտրվի համալսարանի կառավարման խորհրդում և ընտրված ռեկտորը հրամանագրվի լիազոր մարմնի ղեկավարի կողմից: Ռեկտորն ընտրվում է ցուցակային կազմի կեսից ավելի ձայներ հավաքելու պարագայում
Բաժանորդագրվեք մեր ալիքին Telegram-ում