Ժամանակը Երևանում՝ 11:07:36,   13 Մայիս

Եվրոբոնդերով ներգրավվող միջոցներից 250 մլն դոլարը որպես ֆինանսական բարձիկ կհաշվառվի կայունացման դեպոզիտային հաշվին

Եվրոբոնդերով ներգրավվող միջոցներից 250 մլն դոլարը որպես ֆինանսական բարձիկ 
կհաշվառվի կայունացման դեպոզիտային հաշվին

ԵՐԵՎԱՆ, 4 ՓԵՏՐՎԱՐԻ, ԱՐՄԵՆՊՐԵՍ: Հաշվի առնելով շուկայի նպաստավոր պայմանները՝ նպատակահարմար է համարվել եվրոբոնդերի թողարկման միջոցով ներգրավել 250 մլն դոլար ավելի, քան ի սկզբանե բյուջեով նախատեսված ծրագիրն էր:

Այդ մասին կառավարության նիստում նշեց Ֆինանսների նախարար Ատոմ Ջանջուղազյանը՝ անդրադառնալով 750 մլն դոլարի նոր եվրոբոնդերի թողարկմանը:

Ատոմ Ջանջուղազյանը պարզաբանեց, որ խոսքը վերաբերում է 10 տարի ժամկետով ՀՀ-ին տրամադրված պարտքին, որի թողարկման եկամտաբերությունը 3,875 տոկոս է։ «Մենք ունենք հետևյալ պատկերը՝ 3,875 տոկոս թողարկման եկամտաբերություն և 3,6 տոկոս արժեկտրոնային եկամտաբերություն։ Ունենք նաև վարկերի ստացման ծրագիր, ինչպես նպատակային ծրագրերի ֆինանսավորման համար՝ Համաշխարհային բանկ, Ասիական զարգացման բանկ և մեր մյուս գործընկերներ, այնպես էլ բյուջետային աջակցության նպատակով մոտավորապես 50 մլրդ դրամի վարկ։ Եվ շուկայի նպաստավոր պայմանները հաշվի առնելով՝ նպատակահարմար է համարվել 250 մլն դոլարով ավելի ներգրավել, քան ի սկզբանե բյուջեով նախատեսված ծրագիրն էր։ Եվ կառավարության այսօրվա որոշմամբ առաջարկվում է 250 մլն դոլարին համարժեք գումարը հաշվառել կայունացման դեպոզիտային հաշվին՝ որպես ֆինանսական բարձիկ՝ ըստ անհրաժեշտության հետագայում տարվա ընթացքում ծագող խնդիրների նպատակով օգտագործելու համար»,- «Արմենպրես»-ի փոխանցմամբ, ասաց Ջանջուղազյանը:








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ