Շիրակի նորանշանակ մարզպետը «կադրային ջարդի» կողմնակից չէ
ԳՅՈՒՄՐԻ, 21 ՀՈՒՆՎԱՐԻ, ԱՐՄԵՆՊՐԵՍ: Շիրակի նորանշանակ մարզպետ Հովհաննես Հարությունյանը «կադրային ջարդի» կողմնակից չէ: «Արմենպրես»-ի փոխանցմամբ՝ այս մասին նա ասաց հունվարի 21-ին լրագրողների հետ ճեպազրույցում:
«Իմ թիմը Շիրակի մարզն է, մարզի բոլոր այն գրագետ, գործունյա մարդիկ, որոնք պատրաստ են մարզի զարգացման համար աշխատել: Ես չունեմ նախապատրաստած կադրերի բանակ: Ինչ վերաբերում է հետագա փոփոխություններին, դրանք լինելու են պատճառաբանված: Եթե կա մարդ, ով իր աշխատանքը լավ է կատարում, պետք է աշխատի, եթե կան մարդիկ, որոնք անգամ չեն մոտիվացվում, որ երկիրը պետք է հզորացնել, ուրեմն պետք է հեռացվեն»,-ասաց մարզպետը:
Անդրադառնալով մարզի առաջնային խնդիրներին՝ Հովհաննես Հարությունյանը առանձնացրեց գերիների հարցը: «Այս պահին ակտուալ է ու լուծման կարիք ունի մեր 62 գերիների հարցը: Ամենօրյա ռեժիմով այդ հարցով զբաղվում են այն մարդիկ, ովքեր կարող են այդ հարցի մեջ ունենալ ներդրում, կամ կարող են լուծման առաջարկներ ներկայացնել: Մոտեցումը մեկն է՝ գերիները պետք է հնարավորության դեպքում ժամ առաջ վերադառնան: Հարցը քննարկվում է ամենաբարձր մակարդակներում»,-նշեց Հովհաննես Հարությունյանը;
Անդրադառնալով այս դժվարին ժամանակներում Շիրակի մարզպետ նշանակվելու առաջարկի ընտրությանը, Հովհաննես Հարությունյանը տեղեկացրեց, որ աշխատանքի դժվարության բարդությունը գիտակցելով է այն ընդունել: «Ես գիտակցում և պատկերացնում էի գործի ծանրությունը, և հենց պատկերացնելով էլ համաձայնվել եմ այս պաշտոնում աշխատել»,-նշեց մարզպետը:
Վերջում նորանշանակ մարզպետը խոստացավ լրագրողների հետ ուղիղ ու թափանցիկ աշխատել: «Իրար հարգելով, ուղիղ հարցերով՝ ուղիղ պատասխանելով»,-ավելացրեց մարզպետը:
Արմենուհի Մխոյան
Բաժանորդագրվեք մեր ալիքին Telegram-ում