ԵՐԵՎԱՆ, 11 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ Ազգային ժողովի «Բարգավաճ Հայաստան» խմբակցության անդամ Իվետա Տոնոյանն առավել քան վստահ է, որ իրենք հաջողելու են ՀՀ վարչապետ Նիկոլ Փաշինյանի հրաժարականի պահանջի գործում: «Արմենպրես»-ի փոխանցմամբ` այս մասին Տոնոյանն ասաց դեկտեմբերի 11-ին կայացած խորհրդարանական ճեպազրույցների ընթացքում:

«Դեռ շատ վաղ է գնահատական տալ՝ արդյոք պայքարը արդյունք տվել է կամ տալիս է, թե ոչ: Պայքարն ընթացքի մեջ է, և ես առավել քան վստահ եմ, որ մենք այս գործում հաջողելու ենք, որովհետև Նիկոլ Փաշինյանի հրաժարականը չունի որևէ այլընտրանք»,- ասաց Տոնոյանը:

Նա նշեց, որ իրենք պայքարը շարունակելու են օրենքով թույլատրելի բոլոր հնարավոր եղանակներով:

Խորհրդարանական և արտախորհրդարանական ընդդիմադիր կուսակցությունները նոյեմբերի 11-ից տարբեր ակցիաներ են իրականացնում` պահանջելով ՀՀ վարչապետ Նիկոլ Փաշինյանի հրաժարականը: Խորհրդարանական և արտախորհրդարանական ավելի քան 16 կուսակցություններից բաղկացած «Հայրենիքի փրկության շարժում»-ը վարչապետի միասնական թեկնածու է առաջադրել Վազգեն Մանուկյանին: Նա նախկինում զբաղեցրել է ՀՀ վարչապետի, Պաշտպանության նախարարի և Հանրային խորհրդի նախագահի պաշտոնները: