Շուշիում հրթիռակոծությունից հետո մարդասիրական աշխատանքների ժամանակ վիրավորում են ստացել 3 փրկարար
ԵՐԵՎԱՆ, 28 ՀՈԿՏԵՄԲԵՐԻ, ԱՐՄԵՆՊՐԵՍ: Շուշիում Ադրբեջանի կողմից հրթիռակոծությունից հետո մարդասիրական առաքելություն իրականացնելու ժամանակ վիրավորում են ստացել Արցախի արտակարգ իրավիճակների պետական ծառայության Շուշիի շրջանային բաժնի 3 փրկարար: Այս մասին «Արմենպրես»-ը տեղեկացավ Արցախի ԱԻՊԾ-ի տարածած հաղորդագրությունից:
«Բժիշկներից ստացված տեղեկատվության համաձայն, նրանց առողջական վիճակը գնահատվում է միջին ծանրության»,- նշված է հաղորդագրության մեջ:
Շուշիի, ինչպես նաև Արցախի մայրաքաղաք Ստեփանակերտի ուղղությամբ ադրբեջանական կողմը հոկտեմբերի 28-ին «Սմերչ»-ով հարվածներ է հասցրել, եղել են նաև ավիահարվածներ: Հայտնի էր դարձել, որ «Սմերչ» համազարկային կրակի ռեակտիվ համակարգով Շուշիի հրետակոծումից խաղաղ բնակչության շրջանում կա մեկ զոհ և երկու վիրավոր։ Արցախի ՄԻՊ Արտակ Բեգլարյանն ավելի ուշ հայտնել է, որ Ադրբեջանի կողմից Ստեփանակերտի և Շուշիի քաղաքացիական շրջանների թիրախավորման արդյունքում կան մեծ թվով տուժածներ և ավերածություններ: Ստեփանակերտի ծննդատունը դարձել է ավիահարվածի թիրախներից մեկը, դրան մեծ ավերածություններ են հասցվել: Մանրամասները պարզվում են:
Բաժանորդագրվեք մեր ալիքին Telegram-ում