Ժամանակը Երևանում՝ 11:07:36,   26 Հոկտեմբեր

Լոս Անջելեսի քաղաքային խորհուրդը դատապարտել է Արցախի նկատմամբ Ադրբեջանի ագրեսիան

Լոս Անջելեսի քաղաքային խորհուրդը դատապարտել է Արցախի նկատմամբ Ադրբեջանի ագրեսիան

ԵՐԵՎԱՆ, 1 ՀՈԿՏԵՄԲԵՐԻ, ԱՐՄԵՆՊՐԵՍ: Լոս Անջելեսի քաղաքային խորհուրդը հավանություն է տվել քաղաքային խորհրդի անդամ Փոլ Քրեքորյանի հեղինակած բանաձևին, որով դատապարտվում է Արցախի Հանրապետության վրա Ադրբեջանի սանձազերծած հարձակումը: «Արմենպրես»-ին այս մասին հայտնեցին Քրեքորյանի գրասենյակից:

Բանաձևը, որի համահեղինակն է դարձել քաղաքային խորհրդի նախագահ Նուրի Մարտինեսը, պահանջում է, որ ԱՄՆ նախագահ Դոնալդ Թրամփի վարչակազմը և ԱՄՆ Կոնգրեսն օգտագործեն բոլոր դիվանագիտական, տնտեսական և քաղաքական միջոցները, որպեսզի Ադրբեջանին ստիպեն իմաստալից կերպով մասնակցել հակամարտության կարգավորման խաղաղ գործընթացին:

Քրեքորյանի հեղինակած բանաձևում ընդգծվում է, որ Արցախին աջակցությունն անհրաժեշտ է ԱՄՆ-ի շահերի և ամերիկյան հիմնարար սկզբունքների համար:

«Քանի որ մեր երկիրը հիմնված է ժողովրդավարության, ազատության և ինքնորոշման իրավունքի արժեքների վրա և հավատարիմ է դրանց, Միացյալ Նահանգները բարոյական պարտավորություն է կրում կանգնել Արցախի Հանրապետության ժողովրդի կողքին, որը վաստակել է ինքնորոշման իր իրավունքը և բարգավաճել է որպես ազատ, ժողովրդավարական և ինքնիշխան պետություն գրեթե 30 տարվա ընթացքում», - ասված է բանաձեւում:

Քրեքորյանը նշել է, որ միջազգային հանրությունը պետք է դատապարտի Ադրբեջանին՝ ռազմական գործողությունների վերսկսման, հրադադարի մասին համաձայնագրի խախտման և հայ բնակչությանը ավերածություններ պատճառելու համար:

«Ադրբեջանի կոռումպացված և ավտորիտար վարչակարգը բիրտ ուժ է գործադրում Արցախի բնիկ քաղաքացիական բնակչության՝ հայ ժողովրդի նկատմամբ»,- ասել է Քրեքորյանը:

Բանաձևի համահեղինակ, քաղաքային խորհրդի նախագահ Նուրի Մարտինեսն ասել է, որ սեպտեմբերի 27-ից Արցախի ժողովուրդը հարձակման է ենթարկվում ադրբեջանցի զինվորականների կողմից, որոնք դաժանորեն և անխոհեմ հարձակվում են երեխաների և ընտանիքների վրա՝ հանգեցնելով անմեղ մարդկանց մահվան։

«Լոս Անջելես քաղաքը սատարում է հայ ժողովրդին և Արցախի Հանրապետությանը և դատապարտում է Ադրբեջանին՝ այդ դաժան հարձակումների և հրադադարի ռեժիմի խախտման համար: Այսօր ես խորհրդի անդամ Քրեքորյանի և իմ գործընկերների հետ ընդունում եմ մի բանաձև, որը կոչ է անում Սպիտակ տանը, պետքարտուղարին և Կոնգրեսին՝ դատապարտել այդ հարձակումը և անմիջապես վերջ տալ դրան»,- նշել է Մարտինեսը:

Լոս Անջելեսի քաղաքային խորհրդի անդամ Փոլ Քրեքորյանը հիշեցրել է Լոս Անջելես քաղաքի և Արցախի Հանրապետության միջև առկա սերտ կապերի մասին։

«Լոս Անջելեսը միշտ համերաշխ է եղել Արցախի ժողովրդի հետ՝ ճանաչելով այդ ժողովրդի ինքնիշխանությունն ու նրա կառավարության ժողովրդավարական արժեքները»,- ասել է Քրեքորյանը:

Արցախի հետ շփման գծի ողջ երկայնքով սեպտեմբերի 27-ի վաղ առավոտյան Ադրբեջանն ակտիվ հրետակոծություն է սկսել: Հրետակոծվում են նաև խաղաղ բնակավայրերը, դպրոցները, այդ թվում մայրաքաղաք Ստեփանակերտը: Ադրբեջանի հարձակման հետևանքով Արցախում ընդհանուր առմամբ զոհվել է 7 քաղաքացի: Ադրբեջանի ԶՈՒ-ն թիրախավորել է նաև ՀՀ զինվորական և քաղաքացիական ենթակառուցվածքները, որի արդյունքում Վարդենիսի շրջանում սպանվել է 1 քաղաքացիական անձ և այրվել է քաղաքացիական ավտոբուս` Ադրբեջանի ԶՈՒ-ին պատկանող ԱԹՍ-ի հարվածից: Հայկական Զինուժն ունի 103 զոհ և շուրջ 120 վիրավոր տարբեր աստիճանի մարմնական վնասվածքներով։ ՀՀ-ում և Արցախում հայտարարվել է ռազմական դրություն և ընդհանուր զորահավաք։ Արցախի ուղղությամբ Ադրբեջանի կողմից սանձազերծված գործողությունների արդյունքում, ճշտված տեղեկություններով, ադրբեջանական կողմն ունի մարդկային ավելի քան 920 կորուստ և 2100 վիրավոր: Հակառակորդը կորցրել է 84 ԱԹՍ, 7 ուղղաթիռ, 166 զրահատեխնիկա, 1 ինքնաթիռ, 1 «Սմերչ»:





https://zen.yandex.ru/id/5dee07a31e8e3f00ae3051c1


youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ