Ժամանակը Երևանում՝ 11:07:36,   30 Հունիս 2022

Նախնական տվյալներով՝ Արցախի քաղաքացիական բնակչության շրջանում կա ավելի քան 30 վիրավոր

Նախնական տվյալներով՝ Արցախի քաղաքացիական բնակչության շրջանում կա ավելի 
քան 30 վիրավոր

ԵՐԵՎԱՆ, 27 ՍԵՊՏԵՄԲԵՐԻ, ԱՐՄԵՆՊՐԵՍ։ Արցախի Հանրապետությունում նախնական տվյալներով ավելի քան 50 բնակավայր եղել է թիրախի տակ։

«Արմենպրես»-ի հաղորդմամբ՝ այս մասին մամուլի ասուլիսին ասաց Արցախի Հանրապետության Մարդու իրավունքների պաշտպան Արտակ Բեգլարյանը։

«Երկու զոհ ունենք, վիրավորների մասով թվերը դեռևս ճշտվում են և հստակեցվում։ Այս պահի դրությամբ՝ նախնական տվյալներով  քաղաքացիական բնակչության շրջանում ունենք ավելի քան 30 վիրավոր։ Կարծում եմ թիվն ավելի է մեծանալու։ Մեր նախնական տվյալներով ավելի քան 50 բակավայր եղել է թիրախի տակ՝ ադրբեջանական հրետակոծությունների և ԱԹՍ-ների հարվածների ժամանակ։ Այդ բնակավայրերի մեջ մտնում են՝ Ստեփանակերտը, Շուշին, Ասկերանը, Մարտունին, Մարտակերտը, Քարվաճառը, Բերձորը, Հադրութը։ Դրա հետևանքով մեր փաստահավաք առաքելությունը դեռևս ճշտում է բոլոր փաստերն ու տվյալները։ Առաջիկա օրերի ընթացքում պատկերն ավելի հստակ կլինի»,- նշեց Բեգլարյանը։

Նա հայտնեց, որ իրենք հանդես են գալու համապատասխան արտահերթ զեկույցով՝ ներկայացնելով բոլոր ապացույցները՝ հստակ անուններով ու վայրերով։

ԱՀ ՄԻՊ-ի խոսքով՝ առնվազն այս պահի դրությամբ կա մի քանի հարյուր վնասված անշարժ գույք և ենթակառուցվածք՝ ներառյալ ճանապարհներ, էկելտրագծեր, գազի, ջրի խողովակներ, բնակարաններ, մեքենաներ և այլն։

«Այս ամենն ակնհայտ կերպով ցույց է տալիս, որ Ադրբեջանը հասցեական թիրախավորել է քաղաքացիական բնակչությանը։ Այս բնակավայրերը ռազմական օբյեկտներից բավականին հեռու են գտնվում և հակառակորդը չի կարող ասել, որ իրենք թիրախավորել են հենց ռազմական օբյեկտները»,- ասաց Բեգլարյանը։

Արցախի հետ շփման գծի ողջ երկայնքով սեպտեմբերի 27-ի վաղ առավոտյան Ադրբեջանն ակտիվ հրետակոծություն է սկսել: Հրետակոծվում են նաև խաղաղ բնակավայրերը, այդ թվում մայրաքաղաք Ստեփանակերտը: Ադրբեջանական զինուժը կորցրել է 3 ուղղաթիռ, 20 ԱԹՍ, 30 տանկ և հետևակի մարտական մեքենա։ կորուստներ: Ադրբեջանի հարձակման հետևանքով առաջին զոհերը եղել են Մարտունու շրջանում՝ մեկ կին և մեկ երեխա: Նախնական տվյալներով հայկական կողմն ունի 16 զոհ և կա 100-ից ավելի վիրավոր տարբեր աստիճանի մարմնական վնասվածքներով։

Հակառակորդը հրետակոծել է նաև դպրոցներ, ներառյալ Ստեփանակերտում։

Հայաստանի Հանրապետությունում հայտարարվել է ռազմական դրություն և ընդհանուր զորահավաք։

Լիլիթ Դեմուրյան








youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]