Armenian Assembly-ն զորակցում է Արցախի և Հայաստանի անվտանգությունն ապահովող Զինված ուժերին
ԵՐԵՎԱՆ, 27 ՍԵՊՏԵՄԲԵՐԻ, ԱՐՄԵՆՊՐԵՍ: Armenian Assembly-ն հետևում է Արցախում ծավալվող իրադարձություններին և զորակցում Արցախի և Հայաստանի անվտանգությունն ապահովող Զինված ուժերին: «Արմենպրես»-ի փոխանցմամբ` այս մասին ասված է կազմակերպության տարածած հաղորդագրությունում:
«Մենք զորակցում ենք Արցախի և Հայաստանի անվտանգությունն ապահովող Զինված ուժերին, ինչպես նաև Արցախի խաղաղ բնակչությանը: Նման ռազմական ագրեսիան իր բնույթով կործանարար է ցանկացած հարաբերությունների համար: Հպարտանում ենք հայ զինվորականների քաջությամբ: Աստված պահապան բոլոր զինվորներին»,- ասված է հաղորդագրության մեջ:
Armenian Assembly-ն ոչ առևտրային կազմակերպությունն է, որի նպատակն է Հայաստանում եւ սփյուռքում մշակույթի, կրթության, զբոսաշրջության եւ ՏՏ ոլորտներում սոցիալ-ձեռնարկատիրական նախագծերի աջակցությունն ու իրականացումը: 2017 թ.-ի հոկտեմբերին հիմնադրումից ի վեր կազմակերպությունն իրականացրել և աջակցել է ավելի քան 30 նախաձեռնություն Հայաստանում և Ռուսաստանում:
Արցախի հետ շփման գծի ողջ երկայնքով սեպտեմբերի 27-ի վաղ առավոտյան Ադրբեջանն ակտիվ հրետակոծություն է սկսել: Հրետակոծվում են նաև խաղաղ բնակավայրերը, այդ թվում մայրաքաղաք Ստեփանակերտը: Հակառակորդն ունի կենդանի ուժի և զրահատեխնիկայի մեծ կորուստներ: ՊԲ ստորաբաժանումների կողմից ոչնչացվել են հակառակորդի 4 ուղղաթիռ, շուրջ 15 ԱԹՍ, այդ թվում՝ հարվածային, 10 տանկ և հետևակի մարտական մեքենա: Հայկական կողմն Ադրբեջանի Զինված ուժերի փոխգնդապետ է ոչնչացրել: ՊԲ կորուստները ճշտվում են: Քաղաքացիական անձանց շրջանում կան տասնյակ վիրավորներ տարբեր աստիճանի մարմնական վնասվածքներով, Մարտունու շրջանում մեկ կին և մեկ երեխա են զոհվել:
Բաժանորդագրվեք մեր ալիքին Telegram-ում