Ժամանակը Երևանում՝ 11:07:36,   27 Հոկտեմբեր

Շաթիրյանը չի ցանկանում ենթադրություններ անել ՍԴ նախագահի սպասվող ընտրության արդյունքի վերաբերյալ

Շաթիրյանը չի ցանկանում ենթադրություններ անել ՍԴ նախագահի սպասվող 
ընտրության արդյունքի վերաբերյալ

ԵՐԵՎԱՆ, 25 ՍԵՊՏԵՄԲԵՐԻ, ԱՐՄԵՆՊՐԵՍ։ Սահմանադրական դատարանում մեկնարկել է աշխատակարգային փակ նիստը, որում քննարկվում է ՍԴ նախագահի և փոխնախագահի ընտրության հարցը։ Ինչպես տեղեկացնում է «Արմենպրես»-ը, Սահմանադրական դատարանի նախագահի միակ թեկնածուն ՍԴ դատավոր Երվանդ Խունդկարյանն է։

Նիստից առաջ լրագրողների հետ զրույցում ՍԴ նորընտիր դատավոր Էդգար Շաթիրյանը ասաց, որ առնվազն նախագահի ընտրության հարցով սեպտեմբերի 25-ին կլինի վերջնարդյունք, իսկ ինչպիսին կլինի արդյունքը չի ուզում ենթադրություններ անել։

Հարցին, թե ինչպես է վերաբերվում Խունդկարյանի թեկնածությանը ՍԴ նախագահի պաշտոնում, Շաթիրյանը պատասխանեց, որ իր վերաբերմունքը կարտահայտի փակ և գաղտնի քվեարկությամբ։

Լրագրողները նաև Շաթիրյանին խնդրեցին մեկնաբանել ՍԴ դատավոր Հրայր Թովմասյանի կարծիքը քվեարկության հարցում պայմանավորվածություն ձեռք բերելու տպավորության մասին, Շաթիրյանը  ասաց, որ չի ցանկանում մեկնաբանել Թովմասյանի կարծիքը, կարող է միայն իր մասով ասել, որ այդպիսի տպավորություն չունի։

Սահմանադրական դատարանի նախագահ և փոխնախագահ ընտրելու համար հրավիրված աշխատակարգային նիստը մեկնարկել է սեպտեմբերի 23-ին և շարունակվում է մինչ օրս: ՍԴ նախագահի և փոխնախագահի ընտրությունը տեղի կունենա փակ  գաղտնի քվեարկությամբ:

Սեպտեմբերի 15-ին ՀՀ Ազգային ժողովը Սահմանադրական դատարանի դատավորների պաշտոնում ընտրել է Երվանդ Խունդկարյանին, Էդգար Շաթիրյանին և Արթուր Վաղարշյանին : Արթուր Վաղարշյանն ու Էդգար Շաթիրյանը խորհրդարանում երդմամբ ՍԴ դատավորի պաշտոնը ստանձնել են սեպտեմբերի 17-ին: Երվանդ Խունդկարյանի թեկնածությունն առաջադրել էր Դատավորների ընդհանուր ժողովը, Արթուր Վաղարշյանի թեկնածությունը՝ ՀՀ նախագահը, Էդգար Շաթիրյանինը՝ կառավարությունը:

 





https://zen.yandex.ru/id/5dee07a31e8e3f00ae3051c1


youtube

Բոլոր նորությունները    


Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ