Պատմության հետագծով
ԵՐԵՎԱՆ, 23 ՍԵՊՏԵՄԲԵՐԻ, ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ/ԱՐՄԵՆՊՐԵՍ: 1846 թ. սեպտեմբերի 23-ին հայտնաբերվեց Նեպտուն մոլորակը։
- 1920 թ. սեպտեմբերի 23-ին ծնվել է Ալեքսանդր Հարությունյանը՝ հայ մեծանուն կոմպոզիտոր եւ դաշնակահար (մահ.՝ 2012 թ.)։
- 2001 թ. սեպտեմբերի 23-ին ավարտվեց Երեւանի Սուրբ Գրիգոր Լուսավորիչ մայր տաճարի կառուցումը։
- 1865 թ. սեպտեմբերի 23-ին ծնվել է Ստեփան Լիսիցյանը՝ ազգագրագետ, հասարակական գործիչ, պատմաբան, աշխարհագրագետ, բանասեր, մանկավարժ, թարգմանիչ, հրատարակիչ, պրոֆեսոր (1941), ՀԽՍՀ գիտության վաստակավոր գործիչ (1945):
- 1939 թ. սեպտեմբերի 23-ին մահացել է Զիգմունդ Ֆրոյդը՝ ավստրիացի հոգեբան, հոգեբույժ եւ նյարդաբան, հոգեվերլուծության հիմնադիրը (ծնվ.՝ 1856 թ.):
- 1970 թ. սեպտեմբերի 23-ին ստեղծվեց Կանանց թենիսի ասոցիացիան։
Հիշարժան փաստեր
- Ուիլյամ Շեքսպիրը ծնվել եւ մահացել է նույն օրը։ Նա ծնվել է 1564-ի ապրիլի 23-ին եւ մահացել նույն օրը` 52 տարի անց:
- Չարլզ Դիքենսի սիրելի ժամանցներից մեկը ուղեւորությունն էր դեպի Փարիզի դիահերձարան, որտեղ ցուցադրվում էին չբացահայտված անձանց մարմինները:
- Օսկար Ուայլդը լուրջ չէր ընդունում Դիքենսի գործերը եւ նրան հաճախ ծաղրում էր: Չարլզ Դիքենսի ժամանակակից քննադատներն անվերջ նշում էին, որ նա երբեք չի կարող լինել բրիտանացի լավագույն գրողների ցուցակում:
- Էդգար Ալլան Պոն իր ողջ կյանքի ընթացքում վախենում էր մթությունից: Այս վախի հնարավոր պատճառներից մեկն այն էր, որ ապագա գրողը սովորում էր գերեզմանատանը: Դպրոցում, որտեղ սովորում էր տղան, ուսուցիչները չէին կարողացել դասագրքեր գնել, եւ մաթեմատիկայի ուսուցիչը դասեր էր տալիս մոտակա գերեզմանատանը՝ գերեզմանների մեջ: Աշակերտներից յուրաքանչյուրն ընտրում էր գերեզմանաքար եւ կարդում ծննդյան ու մահվան տարիները, այնուհետեւ հաշվարկում, թե քանի տարի է ապրել հանգուցյալը:
- Ջեկ Լոնդոնը սոցիալիստ էր եւ նաեւ առաջին գրողը, ով երբեւէ իր կատարած աշխատանքով մեկ միլիոն դոլար վաստակեց:
- Նախքան իր ստեղծագործական ձեռքբերումներով հայտնի դառնալը, արգենտինացի գրող եւ թարգմանիչ Խորխե Լուիս Բորխեսը իր ապրուստը վաստակում էր յոգուրտների համար գովազդային տեքստեր ստեղծելով:
- Ալեքսանդր Դյուման մի անգամ մասնակցում էր դուելի, որտեղ մասնակիցները վիճակ էին քաշում, եւ պարտվողը պետք է կրակեր ինքն իրեն: Վիճակն ընկավ Դյումային, ով առանձնացավ կողքի սենյակում: Հնչեց կրակոց, որից հետո Դյուման վերադարձավ մասնակիցների մոտ՝ ասելով. «Ես կրակեցի, բայց չդիպա»:
- Էրիխ Մարիա Ռեմարկը այնքան էր ամաչում իր առաջին հրատարակած վեպից, որ գնել է շրջանառության մեջ գտնվող դրա բոլոր օրինակները եւ ոչնչացրել:
Մ. Ա.
Բաժանորդագրվեք մեր ալիքին Telegram-ում