Ժամանակը Երևանում՝ 11:07:36,   24 Սեպտեմբեր

Հաստատվեց հակաճգնաժամային 24-րդ միջոցառումը. աջակցություն` գինեգործներին ու կոնյակագործներին

Հաստատվեց հակաճգնաժամային 24-րդ միջոցառումը. աջակցություն` 
գինեգործներին ու կոնյակագործներին

ԵՐԵՎԱՆ, 13 ՕԳՈՍՏՈՍԻ, ԱՐՄԵՆՊՐԵՍ: Կառավարությունը հաստատեց կորոնավիրուսի տնտեսական հետևանքների չեզոքացման 24-րդ միջոցառումը, որով աջակցություն է ցուցաբերվելու խաղողագործներին, գինեգործներին ու կոնյակագործներին:

«Արմենպրես»-ի փոխանցմամբ, Էկոնոմիկայի նախարար Տիգրան Խաչատրյանը նշեց, որ ինչպես ներքին շուկայում, այնպես էլ արտաքին արտահանման շուկաներում կորոնավիրուսի տարածումն ուղղակի ազդեցություն է թողել կոնյակագործության և գինեգործության ոլորտի կազմակերպությունների արդյունքների վրա:

«Արտադրանքի նկատմամբ պահանջարկը նվազել է, ինչն ազդել է վաճառքների ծավալների վրա: Պաշտոնական վիճակագրական տվյալներով՝ թե արտահանման թվերը և, թե ներքին շուկայում իրացման ծավալներն ավելի քան 30 տոկոսով անկում են արձանագրել: Որոշ կազմակերպությունների մոտ ավելի մեծ անկումներ են արձանագրվել: Այս ամենն ազդեցություն է թողել կազմակերպությունների վրա երկու առումով. նվազել են ընթացիկ դրամական եկամուտները, որովհետև նվազել է վաճառքը, և երկրորդ՝ այդ ոլորտում գործունեության պայմանների վատթարացման հետևանքով բանկերն ավելի զգուշավոր են և դժվարությամբ են վարկավորում: Այդ երկու գործոններն առաջացնում են կազմակերպությունների մոտ ֆինանսական միջոցների որոշակի դեֆիցիտ, և դա այն ժամանակահատվածում, երբ առջևում խաղողի մթերումներն են, իսկ այս տարի խաղողի բերքը ավելի բարձր է լինելու նախորդ մի քանի տարիների համեմատ»,- «Արմենպրեսի» հաղորդմամբ, նշեց նախարարը:

Միջոցառմամբ նախատեսվում է խաղող մթերող կոնյակի և գինու արտադրությամբ զբաղվող կազմակերպություններին տրամադրել սուբսիդավորվող վարկեր, կառավարությունը կսուբսիդավորի վարկի տոկոսն ամբողջությամբ:

Օժանդակության տրամադրման ձևերը և դրանց պայմանները հետևյալն են՝ վարկերը տրամադրվում են ՀՀ դրամով` մինչև 14 տոկոս տոկոսադրույքով, իսկ արտարժույթով` մինչև 9 տոկոս տոկոսադրույքով, որոնք ամբողջությամբ սուբսիդավորվում են,  յուրաքանչյուր վարկառուին տրամադրվող վարկերի մայր գումարի մնացորդը չի կարող գերազանցել 3.0 մլրդ դրամը, ունեն առավելագույնը 24 ամիս մարման ժամկետ, վարկերի մայր գումարի մարման համար սահմանված արտոնյալ ժամկետը վարկը տրամադրելու պահից հաշվարկվելու է առնվազն 3 ամիս, բայց ոչ ավելի, քան 6 ամիս.

Լիզինգի պետական աջակցության ծրագրի պայմաններին համապատասխան՝ լիզինգի տրամադրման պայմաններն են. լիզինգը տրամադրվում է Հայաստանի Հանրապետության դրամով՝ մինչև 14, իսկ արտարժույթով` մինչև 9 տոկոս տոկոսադրույքով, որոնք ամբողջությամբ սուբսիդավորվում են, լիզինգով ձեռք բերվող սարքավորումների և հիմնական միջոց հաշվառվող հումքի և արտադրանքի պահման մետաղյա տարողությունների ու գինեգործության ոլորտում օգտագործվող կաղնեփայտե տարաների արժեքների հանրագումարը չպետք է գերազանցի 1000.0 մլն դրամը, լիզինգի տրամադրման ամսաթիվ է համարվում լիզինգի պայմանագրի կնքման օրը: Բացի այդ, կառավարության 2019 թվականի փետրվարի 28-ի N 201-Լ որոշմամբ հաստատված Գյուղատնտեսական հումքի մթերումների (գնումների) նպատակով ագրովերամշակման ոլորտին տրամադրվող վարկերի տոկոսադրույքների սուբսիդավորման ծրագրի շրջանակում խաղողի վերամշակմամբ զբաղվող տնտեսավարող սուբյեկտներին 2019 թվականին տրամադրված վարկերի մայր գումարի մարման համար սահմանված 12 ամիս ժամկետները կարող են երկարաձգվել մինչև 15 ամիս ժամկետով՝ ծրագրին մասնակից ֆինանսական կառույցների և շահառուների փոխադարձ համաձայնությամբ:





https://zen.yandex.ru/id/5dee07a31e8e3f00ae3051c1


youtube

Բոլոր նորությունները    


New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ