Մեկնարկեց «Քայլ դեպի տուն» ուսումնաճանաչողական առցանց ծրագիրը
ԵՐԵՎԱՆ, 3 ՕԳՈՍՏՈՍԻ, ԱՐՄԵՆՊՐԵՍ: Մեկնարկեց ՀՀ սփյուռքի գործերի գլխավոր հանձնակատարի գրասենյակի «Քայլ դեպի տուն» ուսումնաճանաչողական առցանց ծրագիրը: «Արմենպրես»-ի փոխանցմամբ` այս տարի առաջին անգամ ծրագիրն անցկացվելու է առցանց:
«Մենք ամեն տարի ունեցել ենք հրաշալի ծրագիր, երբ հարյուրավոր երիտասարդների բերել ենք Հայաստան և ունեցել հրաշալի օրեր: Այս տարի որոշեցինք հայրենիքը բերել ձեր տուն, քանի որ չցանկացանք համավարակի պատճառով չեղարկել ծրագիրը: Հույս ունեմ, որ հաջորդ տարի մենք բոլորս կկարողանանք ֆիզիկապես լինել հայրենիքում»,- ծրագրի մասնակիցներին ողջունելով ասաց ՀՀ սփյուռքի գործերի գլխավոր հանձնակատարի գրասենյակի ղեկավար Սառա Անջարգոլյանը:
Նա աշխարհի տարբեր երկրներում ապրող մասնակիցներին հայտնեց, որ սիրով սպասում են նրանց Հայաստանում:
ՀՀ սփյուռքի գործերի գլխավոր հանձնակատարի գրասենյակը 2020 թվականի օգոստոսի 3-28 սփյուռքի 12-18 տարեկան պատանիների և երիտասարդների համար 2 փուլով կիրականացնի «Քայլ դեպի տուն» ուսումնաճանաչողական երկշաբաթյա առցանց ծրագիրը։ Ծրագիրը ներառում է Հայոց լեզվի դասընթացներ, պատմաճանաչողության դասընթացներ, վիրտուալ այցեր համայնքներ (Հայաստանում և Սփյուռքում), ինտերակտիվ քննարկումներ, բանավեճի ակումբ, առցանց կրթական խաղեր, հանդիպումներ պետական և հանրային գործիչների, մշակույթի, արվեստի ներկայացուցիչների հետ, հանդիպումներ նախորդ տարվա մասնակիցների հետ, աշխատարաններ, համայնքային նախագծեր:
Մասնակցելով ծրագրին՝ սփյուռքահայ պատանիներին և երիտասարդներին հնարավորություն կտրվի Հայաստանի պատմությանն ու մշակույթին ծանոթանալու, մայրենի լեզուն սովորելու և հայաստանցի երիտասարդների հետ շփման միջոցով՝ ճանաչելու իրենց հայրենիքը:
«Քայլ դեպի տուն» ուսումնաճանաչողական առցանց ծրագրին կմասնակցեն մինչև 250 սփյուռքահայ երիտասարդներ՝ աշխարհի 30 երկրից:
Ծրագիրն իրականացվում է «Դասավանդի՛ր, Հայաստան» (Teach for Armenia) կրթական հիմնադրամի հետ համատեղ: Ծրագրի գործընկերն է ՀԲԸՄ Հայկական վիրտուալ համալսարանը:
Բաժանորդագրվեք մեր ալիքին Telegram-ում