Կոտայքի 90 դպրոցներում կարվեն կապիտալ վերանորոգման և շենքային պայմանների բարելավման աշխատանքներ
22:54, 16 Հուլիս 2020
ԵՐԵՎԱՆ, 16 ՀՈՒԼԻՍԻ, ԱՐՄԵՆՊՐԵՍ: Մարզային ենթակայության հանրակրթական ուսումնական հաստատություններում իրականացված ֆինանսական վերաբաշխումների արդյունքում Կոտայքի մարզի շուրջ 90 դպրոցներում կիրականացվեն ավելի քան 437 մլն դրամ արժողությամբ կապիտալ վերանորոգման և շենքային պայմանների բարելավման աշխատանքներ: «Արմենպրես»-ին այս մասին տեղեկացնում են ՀՀ Կոտայքի մարզպետարանի տեղեկատվության և հասարակայնության հետ կապերի բաժնից:
160 միլիոն ՀՀ դրամ արժողությամբ շինաշխատանքներ կիրականացվեն Աբովյանի թիվ 10 հիմնական դպրոցում, որը կուղղվի տարրական դասարանների համար առանձին նոր մասնաշենքի կառուցմանը։Արդեն դիմել են Քաղաքաշինության պետական կոմիտե` ժամանակակից չափորոշիչներին համապատասխան եռահարկ շինության նախագծային աշխատանքներին ընթացք տալու նպատակով:
Հրազդանի 14 հիմնական դպրոցի պատուհանների ամբողջական փոխարինման համար տրամադրվել է 37 միլիոն ՀՀ դրամ:
Կկատարվի Կարենիսի միջնակարգ դպրոցի տանիքի և պատուհանների փոխարինում՝ վերաբաշխման արդյունքում տրամադրվել է 23 միլիոնՀՀ դրամ, Զառի միջնակարգ դպրոցի պատուհանների փոխարինում և ջեռուցման համակարգի անցկացում՝ վերաբաշխման արդյունքում տրամադրվել է 20 միլիոն ՀՀ դրամ, Արգելի միջնակարգ դպրոցի առաջին հարկի շքամուտքի և դասասենյակների վերանորոգում՝ վերաբաշխման արդյունքում տրամադրվել է 20 միլիոն ՀՀ դրամ:
Մի շարք դպրոցներում կիրականացվեն պատուհանների ամբողջական փոխարինման, տանիքների ընթացիկ նորոգման, մարզադահլիճների դասասենյակների ու սանհանգույցների վերանորոգման աշխատանքներ։ Առաջնահերթություններից է նաև որոշ համայնքներում դպրոցների ջեռուցման համակարգի անցկացման և արդիականացման հարցը:
Բաժանորդագրվեք մեր ալիքին Telegram-ում