ԵՐԵՎԱՆ, 9 ՀՈՒԼԻՍԻ, ԱՐՄԵՆՊՐԵՍ: «Հայկական էթնոսի ձևավորման հիմքում ընկած է հենց արյան գործոնը: Օրինակ՝ մեր նախարարական տները հին ցեղային միությունների առաջնորդական տներն էին։ Նրանք կառավարում էին այն տարածքներում, որտեղ ապրում էին իրենց ժողովուրդները: Մարդկանց համար առաջնայինը ոչ թե դասակարգային տարբերությունն էր, այլ արյունակցական կապը: Ուստի և դասակարգային պայքարի պատճառներ, ըստ էության, չկային: Կարող ենք ասել, որ արդյունքում, որպես ժողովուրդ, սոցիալական խնդիրներ չենք կարողացել լուծել անցյալում, չենք կարողանում նաև հիմա:

Փաստորեն, վերջին ավելի քան 2000-ամյա մարդկության այս վազքին չենք մասնակցել, հետ ենք մնացել: Ճիշտ է` նրան շատ բան ենք տվել այդ ընթացքում․ հայերին են պարտական արևելք-արևմուտք առևտրային կապի համար, եվրոպական վերածնունդը սկիզբ առավ հայկական պավլիկյան շարժումից  և այլն, և այլն: Սակայն դրանք ազգային որակի հարցեր են, ո՛չ դասակարգային: Ես բազմիցս եմ ասել. եթե ուզում ենք մեր ազգին ոտքի հանել, խոսել հացի գնի թանկացումից, անհեթեթություն է. ոչինչ չի ստացվի: Իսկ եթե դրվեն ազգային խնդիրներ, անմիջապես կմիավորվի ու ոտքի կելնի:

Այ, հիմա ժողովուդներին փոխարինելու են գալիս ազգերը: Այսինքն` գալիս են մե՛ր ժամանակները: Դրվելու են ազգային խնդիրներ: Սոցիալական խնդիրները մղվելու են հետին պլան: Նրանք, ովքեր համընթաց կգնան նոր համակարգի սկզբունքներին, կմնան, ովքեր` ոչ, կոչնչանան»:

Նյութն ամբողջությամբ կարդացեք թերթի այսօրվա համարում