ԵՐԵՎԱՆ, 8 ՀՈՒԼԻՍԻ, ԱՐՄԵՆՊՐԵՍ: ՀՀ Ազգային ժողովը երկրորդ ընթերցմամբ և ամբողջությամբ ընդունելու համար քննարկեց ՀՀ կառավարության և ԱԺ պատգամավոր Էդվարդ Անդրեասյանի հեղինակած «ՀՀ վարչական դատավարության օրենսգրքում փոփոխություններ և լրացում կատարելու մասին» և «Վարչարարության հիմունքների և վարչական վարույթի մասին»  օրենքում լրացում կատարելու մասին» օրենսդրական փաթեթը: «Արմենպրես»-ի փոխանցմամբ՝ այն խորհրդարանի արտահերթ նիստում ներկայացրեց ՀՀ արդարադատության նախարարի առաջին տեղակալ Ռաֆիկ Գրիգորյանը:

Փոխնախարարի խոսքով` ներկա կարգավորմամբ վարչական ակտի հասցեատեր չհանդիսացող անձի կողմից վարչական ակտի հասցեատեր հանդիսացող անձի համար բարենպաստ վարչական ակտը բողոքարկելու դեպքում տեղի է ունենում վարչական ակտի կատարման կասեցում օրենքի ուժով` ավտոմատ եղանակով: Այս կարգավորումը գործնականում մի շարք խնդիրներ է առաջացրել. դրանք հիմնականում բարձրացվել են շինթույլտվությունների վիճարկման վարութներից: Առաջարկվող կարգավորմամբ վարչական ակտի հասցեատեր չհանդիսացող անձի կողմից բողոքարկման ժամանակ ավտոմատ կասեցում տեղի չի ունենա, այլ հնարավորություն կընձեռվի հայց ներկայացնող կողմին` միջնորդելու կասեցումը կիրառելու համար:

Ռաֆիկ Գրիգորյանը հստակեցրեց, որ այս գործերով առաջարկվող լուծումը չի նշանակում, որ կասեցում տեղի չի ունենալու, այլ կասեցումը լինելու է միայն դատարանում քննարկման արդյունքում` միջանկյալ դատական ակտի տեսքով, որը կրկին բողոքարկման ենթակա է:

Նորայր Շողիկյան