Մեսսիի աշխատավարձը կարող է կրճատվել
ԵՐԵՎԱՆ, 7 ՀՈՒԼԻՍԻ, ԱՐՄԵՆՊՐԵՍ: Կատալոնական «Բարսելոնայի» արգենտինացի հարձակվող Լիոնել Մեսսիի աշխատավարձը կարող է կրճատվել:
«Արմենպրես»-ի հաղորդմամբ` այս մասին գրում է Sport.es-ը: Ըստ պարբերականի, «Բարսելոնայի» նախագահ Խոսեպ Մարիա Բարտոմեուն հանդիպել է արգենտինացի հարձակվողի հետ և տեղեկացրել նրան որոշման մասին: Կատալոնական թիմը Մեսսիին վճարում է 90 միլիոն եվրո, որի կեսը գնում է հարկերին:
Ավելի վաղ լուրեր կային, որ Մեսսին ուզում է կարիերան շարունակել այլ ակումբում: Հարձակվողը չի շարունակում բանակցությունները «Բարսելոնայի» հետ նոր պայմանագրի շուրջ: Այն նախատեսված է մինչև 2021 թվականը: Մեսսին ակումբում իր մտերիմներին փոխանցել է, որ անընդունելի է համարում, որ թիմում յուրաքանչյուր որոշման համար ինքն է պատասխանատվություն կրում, թեպետ որևէ կապ չունի դրա հետ: Մեսսին իր ողջ կարիերայի ընթացքում 630 գնդակ է խփել «Բարսելոնայի» կազմում, որտեղ մասնակցել է 724 խաղի, ինչպես նաև 70 գնդակ է հեղինակել Արգենտինայի հավաքականի կազմում անցկացրած 138 խաղում: Ընթացիկ մրցաշրջանում Մեսսին «Բարսելոնայի» կազմում մասնակցել է 28 խաղի և խփել է 22 գնդակ:
Պատրաստեց Վարվառա Հայրապետյանը
Բաժանորդագրվեք մեր ալիքին Telegram-ում