Թուրքիայի պաշտպանության նախարարը եւ գլխավոր շտաբի պետը ժամանել են Լիբիա
ԵՐԵՎԱՆ, 3 ՀՈՒԼԻՍԻ, ԱՐՄԵՆՊՐԵՍ: Թուրքիայի պաշտպանության նախարար Խուլուսի Աքարը եւ երկրի զինված ուժերի գլխավոր շտաբի պետ Յաշար Գյուլերը չհայտարարված այցով ժամանել են Լիբիա: Այդ մասին, ինչպես տեղեկացնում Է «Արմենպրես»-ը, հաղորդել Է Anadolu գործակալությունը:
«Աքարը եւ Գյուլերը Լիբիա են ժամանել այն գործունեությանը ծանոթանալու համար, որը կապված Է ավելի վաղ կնքված հուշագրերի հետ»,-ասվում Է գործակալության հաղորդագրության մեջ:
Թուրքիայի նախագահ Ռեջեփ Թայիփ Էրդողանը հուլիսի 3-ին ունեցած ելույթի ընթացքում հաստատել Է, որ պաշտպանության նախարարն այցով գտնվում Է Տրիպոլիում:
Լիբիայում շարունակվում Է դիմակայությունը Ֆայեզ Սարաջի Ազգային համաձայնության կառավարության (ԱՀԿ), որը վերահսկում Է Տրիպոլին ու երկրի արեւմուտքի տարածքները եւ աջակցություն Է ստանում Թուրքիայի կողմից, եւ Խալիֆա Հաֆթարի հրամանատարության ներքո գտնվող Լիբիայի ազգային բանակի միջեւ, որին քաղաքական աջակցություն Է ցուցաբերում Եգիպտոսը:
Արդեն ավելի քան մեկ տարի Հաֆթարիի բանակը փորձում Է հետ գրավել Լիբիայի մայրաքաղաքը: Հակամարտության երկու կողմերը հայտարարում են, որ հակառակորդները զենքի եւ կենդանի ուժի օգնություն են ստանում դրսից:
Վերջին շաբաթների ընթացքում ԱՀԿ-ի ուժերը հաղորդել են Տրիպոլիի համար ճակատամարտում զգալի հաջողությունների մասին եւ հայտարարել հաջողությունն ընդլայնելու մտադրության մասին՝ հսկողություն հաստատելով Սիրտ քաղաքի եւ մայրաքաղաքից դեպի արեւելք ընկած այլ տարածքների վրա:
2019 թվականի նոյեմբերի վերջին Էրդողանը եւ Սարաջը հուշագրեր են ստորագրել ռազմական ոլորտում համագործակցության շուրջ եւ ծովային գոտիներին վերաբերող փոխըմբռնման մասին, հաղորդել Է ՌԻԱ Նովոստին:
Բաժանորդագրվեք մեր ալիքին Telegram-ում