ԳԱՎԱՌ, 3 ՀՈՒԼԻՍԻ, ԱՐՄԵՆՊՐԵՍ: Գեղարքունիքի մարզի Մարտունի քաղաքի բժշկական կենտրոնի նոր շենքի շինարարությունը կմեկնարկի 2020 թվականի հուլիսին:  

Ինչպես «Արմենպրես»-ին  տեղեկացրեց Գեղարքունիքի մարզպետ Գնել Սանոսյանը, շինարարության ավարտը նախատեսված է 2022 թվականին: Նորակառույց ու արդիական սարքավորումներով հագեցած բժշկական կենտրոնը կունենա 4 600 քմ օգտագործելի մակերես, 55 մահճակալ: Կառույցը կլինի միահարկ: «Շինարարությունը նախատեսված էր սկսել հունիսին, սակայն փաստաթղթերի կարգավորման հետ կապված խնդիրների պատճառով տեղափոխվեց հուլիս ամիս: Հիմա ամեն ինչ կարգավորված է, եւ շատ շուտով կսկսվի շինարարությունը: Նոր շենքը վեր է բարձրանալու Մարտունու բժշկական կենտրոնի նախկին ինֆեկցիոն բաժանմունքի տեղում: Շինարարությունը նախատեսված է ավարտել 2022 թվականին, սակայն հույս ունենք, որ այն կընթանա ավելի արագացված տեմպերով, և մենք ավելի սեղմ ժամկետներում կունենանք արդի չափորոշիչների համապատասխան հերթական բժշկական կենտրոնը մեր մարզում»,- հավաստեց Գեղարքունիքի մարզպետը:

Խոսրով Խլղաթյան