Դատարանը Աբրահամ Մանուկյանին կալանավորելու միջնորդության քննարկումը կշարունակի հունիսի 22-ին
ԵՐԵՎԱՆ, 19 ՀՈՒՆԻՍԻ, ԱՐՄԵՆՊՐԵՍ։ Երևանի ընդհանուր իրավասության դատարանի Շենգավիթի նստավայրում նախկին պատգամավոր Աբրահամ Մանուկյանին կալանավորելու միջնորդության քննարկումը հետաձգվեց՝ Մանուկյանի ինքնազգացողության վատացման պատճառով։ «Արմենպրես»-ի հետ զրույցում այս մասին ասաց նրա պաշտպան Հրանտ Անանյանը։
«Երրորդ օրն է, ինչ քննարկվում է միջնորդությունը։ Այսօր պաշտպանական կողմը 2,5 ժամ հանդես է եկել ելույթով, որից հետո ելույթի հերթը հասել էր Մանուկյանին, բայց նրա ինքնազգացողությունը վատացավ և նիստը հետաձգվեց»,- ասաց Անանյանը։
Դատական նիստը կնշարունակվի հունիսի 22-ին, ժամը 9։30-ին։
Ազգային Ժողովի նախկին պատգամավոր Աբրահամ Մանուկյանին մեղադրանք է առաջադրվել ՀՀ քրեական օրենսգրքի 38-154.2-րդ հոդվածի 2-րդ մասի հատկանիշներով՝ ընտրակաշառք տալուն օժանդակելու համար։
Մամուլում շրջանառվող տեղեկությունների համաձայն՝ Մանուկյանի ձերբակալումը կապված է «Մուլտի Գրուպ Կոնցեռն» ՍՊ ընկերության գլխավոր տնօրեն Սեդրակ Առուստամյանի քրեական գործի հետ։
Աբրահամ Մանուկյանը 2003-2007 թվականներին եղել է Հայաստանի Հանրապետական կուսակցության խմբակցության պատգամավոր, իսկ արդեն 2012-2018 թվականներին «Բարգավաճ Հայաստան» կուսակցության պատգամավոր։
Բաժանորդագրվեք մեր ալիքին Telegram-ում