ԵՐԵՎԱՆ, 13 ՀՈՒՆԻՍԻ, ԱՐՄԵՆՊՐԵՍ։ ՀՀ վարչապետ Նիկոլ Փաշինյանը COVID-19-ի տարածումը կանխելու նպատակով հակահամաճարակային միջոցառումների չպահպանումը և հանրային նման վարքագծի հոգեբանական շերտերից մեկը համարում է պետական կարգի նկատմամբ վերաբերմունքը։

«Արմենպրես»-ի հաղորդմամբ՝ այս մասին «Ֆեյսբուք»-ի ուղիղ եթերում ասաց ՀՀ վարաչապետ Նիկոլ Փաշինյանը։

«Սահմանված կարգը համատարած չպահպանելու խնդիրը դուրս է եկել կորոնավիրուսի շրջանակից։ Այս խնդիրն արդեն պետք է հասկանանք հանրային, գուցե ազգային հոգեբանական շերտերի մեջ: Եկել եմ հետևյալ եզրահանգմանը. իմ վարկածը հետևյալն է, այս ամենը մեր հավաքական վերաբերմունքն է մեր պետական կարգի նկատմամբ, և պետք է արձանագրեմ, որ 500 տարի և ավելի պետականություն չենք ունեցել և պետական կարգը միշտ եղել է օտար: Մեզ համար պետությունն ու կարգը հարյուրամյակներ շարունակ եղել է օտարածին, օտարի կողմից պարտադրված ինչ-որ մի բան: Հետևաբար, պետական կարգը մեր ենթագիտակցության մեջ ասոցացվել է բռնության հետ, այսինքն՝ մի բան, որ բռնությամբ, մեր արժանապատվությունը ոտնահարելով հաստատվել է ուրիշի կողմից: Շատ հաճախ այդպես եղել է նաև 3-րդ հանրապետության պատմության մեջ: Կարգը հակադրված է եղել մեր կամքին»,- նշեց Փաշինյանը:

Նրա խոսքով՝ 2018 թվականի ոչ բռնի, թավշյա հեղափոխությունը հայ ազգին բերել է ազատություն, ու քանի որ պետական կարգը ենթագիտակցաբար միշտ հակոտնյա է եղել մեր ազատության հետ, հիմա այս ճգնաժամային իրավիճակում ասոցացվում է որպես ժողովրդին ազատությունից զրկելու հերթական փորձ:

«Հեղափոխությունն ազատագրել է մեզ, հետևաբար մեր ազատությունն ասոցացվում է կարգի բացակայության հետ: Սա շրջադարձային պահ է մեզ համար, մեր պետականության համար։ Մենք մեր կամքով պետք է ստեղծենք կարգ: Դա նշանակում է, որ մենք կջնջենք մեր ենթագիտակցության միջից պետականազրկության ամբողջ ինֆորմացիան: Մենք առաջին անգամ ունենք հնարավորություն կարգ ստեղծել մեր կամքով, քաղաքացու կամքով, և ոչ թե բռնությամբ»,-ասաց վարչապետը:

Փաշինյանը կոչ արեց, որպեսզի հայերը, որպես քաղաքացի իրենց կամքով կարգ հաստատեն, ինչը նշանակում է, որ ամեն մեկն ինքը կկատարի կարգից բխող պայմանները, ինքը կարգ կստեղծի իր վարքագծով և նույնը կպահանջի մյուսներից։

Նա ընդգծեց, որ պետք է ստեղծել այնպիսի միջավայր, որպեսզի ստեղծած այդ կարգը չկատարելը դառնա ամոթալի, կարգը չկատարողն իրեն զգա օտարված, ինչը մոտիվացիա կլինի նրանց համար, որպեսզի վերադառնան հանրային համակեցության մեջ:

Հայաստանում հունիսի 13-ի՝ ժամը 11:00-ի դրությամբ կորոնավիրուսի հաստատված դեպքերի ընդհանուր թիվը 16 004 է, արձանագրվել է մահվան 264 դեպք: Ընդհանուր առմամբ իրականացվել է 80 130 թեստ: Կորոնավիրուսից ապաքինվել 6081 պացիենտ։Այս պահին փաստացի բուժում է ստանում 9568 պացիենտ:Արձանագրվելնաև մահվան 91 դեպք, երբ պացիենտների մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով։

Կառավարությունը հունիսի 12-ին որոշում է կայացրել ՀՀ-ում մարտի 16-ին հայտարարված և մինչև հունիսի 13-ը երկարաձգված արտակարգ դրության ժամկետը 2020 թվականի հունիսի 13-ից՝ ժամը 17:00-ից երկարաձգել ևս 30 օրով՝ մինչև հուլիսի 13-ը՝ ժամը 17:00-ն ներառյալ:

Լիլիթ Դեմուրյան