Ձյուդոիստները վարկանիշային մրցաշարերը կվերսկսեն պանդեմիայի նվազ վտանգավոր փուլում
ԵՐԵՎԱՆ, 10 ՀՈՒՆԻՍԻ, ԱՐՄԵՆՊՐԵՍ: Ձյուդոյի միջազգային ֆեդերացիան միջազգային և վարկանիշային մրցաշարերը կվերսկսի կորոնավիրուսի պանդեմիայի նվազ վտանգավոր շրջանում:
«Արմենպրես»-ի հաղորդմամբ` այս մասին գրում է ՀԱՕԿ-ը` մեջբերելով միջազգային ֆեդերացիայի նամակը ազգային ֆեդերացիաներին. «Մենք ուշադիր հետևում ենք աշխարհի առողջապահական իրավիճակին, տարբեր երկրների կառավարությունների հրահանգներին և COVID-19- ի դեմ պայքարի ընթացքին: Ուրախ ենք, որ որոշ երկրներ իրենց սահմանները բացելու ճանապարհին են: Ֆեդերացիան քննարկում է համաշխարհային մրցաշարերի ժամկետները հետաձգելու հարցը: Երբ իրավիճակը կդառնա անվտանգ, կվերսկսվեն օլիմպիական խաղերի վարկանիշային մրցաշարերը։ Նախատեսում ենք գործընթացը սկսել սեպտեմբերին: Հուսանք, որ այդ ժամանակ առողջապահական ճգնաժամն այլևս չի ազդի ճանապարհորդության և աշխատանքային պայմանների վրա»:
Ավելի վաղ հայտնի էր դարձել, որ ձյուդոյի եվրոպական ասոցացիան հրապարակել է կորոնավիրուսի պանդեմիայի պատճառով չեղարկված կամ հետաձգված մրցաշարերի նոր օրացուցային պլանը: Եվրոպայի առաջնությունը կկայանա նոյեմբերի 8-10-ը Չեխիայի մայրաքաղաք Պրահայում: Այն վարկանիշային է Տոկիոյի Օլիմպիական խաղերի համար:
Տոկիոյի Օլիմպիական խաղերի համար ձյուդոիստները քվոտաներ կստանան միջազգային ֆեդերացիայի կողմից վարկանիշային աղյուսակում զբաղեցրած դիրքի շնորհիվ: Խաղերին մասնակցելու իրավունք կստանան առաջին 25 տեղերը զբաղեցրած մարզիկները:
Պատրաստեց Վարվառա Հայրապետյանը
Բաժանորդագրվեք մեր ալիքին Telegram-ում