ԼՀԿ-ն «տոտալ լոքդաուն»-ի պարագայում մարդկանց ֆինանսապես օժանդակելու անհրաժեշտություն է տեսնում
ԵՐԵՎԱՆ, 5 ՀՈՒՆԻՍԻ, ԱՐՄԵՆՊՐԵՍ: Ազգային ժողովի «Լուսավոր Հայաստան» խմբակցությունը կորոնավիրուսի համավարակի տարածման հետևանքով խիստ սահմանափակումների ռեժիմի կամ «տոտալ լոքդաուն»-ի վերադառնալու պարագայում, մարդկանց ֆինանսապես օժանդակելու անհրաժեշտություն է տեսնում:
«Արմենպրես»-ի փոխանցմամբ՝ այս մասին խորհրդարանական ճեպազրույցների ընթացքում ասաց խմբակցության ղեկավար Էդմոն Մարուքյանը:
«Անիմաստ է երկու շաբաթով փակելը, փակելուց պետք է ավելի երկար ժամանակով փակել: Մարդկանց ֆինանսավորել է պետք այդ պարագայում ու վարկային արձակուրդներ տալ: Կարող ենք փակել, եթե բոլորին փող տանք, ես շարունակում եմ պնդել, որ այդ գումարը կա: Եթե մարդկանց փող չտան փակելով, մարդիկ տանը չեն մնալու»,- ասաց Մարուքյանը:
ՀՀ վարչապետ Նիկոլ Փաշինյանն ավելի վաղ նշել էր, որ պարետատանը քննարկվում է նաև երկու շաբաթով «տոտալ լոքդաուն»-ի գնալու հարցը:
Հայաստանում հունիսի 5-ին, ժամը 11:00-ի դրությամբ հաստատվել է կորոնավիրուսային հիվանդության ընդհանուր 11 817 դեպք, որոնցից 3 513 -ն` առողջացած: Ընդհանուր առմամբ, կորոնավիրուսային հիվանդությունից արձանագրվել է մահվան 183: Արձանագրվել է մահվան ևս 69 դեպք, երբ պացիենտների մոտ հաստատվել է կորոնավիրուսային վարակ, սակայն մահը վրա է հասել այլ հիվանդության պատճառով։
Կառավարությունը մայիսի 14-ին որոշում է կայացրել ՀՀ-ում մարտի 16-ին հայտարարված և մինչև մայիսի 14-ը երկարաձգված արտակարգ դրության ժամկետը մայիսի 14-ից՝ ժամը 17:00-ից երկարացնել ևս 30 օրով՝ մինչև հունիսի 13-ը՝ ժամը 17:00-ն ներառյալ ժամկետով:
Նորայր Շողիկյան
Բաժանորդագրվեք մեր ալիքին Telegram-ում