Գործադիրն առաջարկում է համայնքներում ուժեղացնել բնապահպանական կրթության և դաստիարակության դերը
ԵՐԵՎԱՆ, 3 ՀՈՒՆԻՍԻ, ԱՐՄԵՆՊՐԵՍ: ՀՀ Ազգային ժողովն առաջին ընթերցմամբ ընդունելու համար քննարկում է «Տեղական ինքնակառավարման մասին» Հայաստանի Հանրապետության օրենքում փոփոխություն և լրացումներ կատարելու մասին օրենքի նախագիծը, որի նպատակն է՝ համայնքներում ուժեղացնել բնապահպանական կրթության և դաստիարակության դերը: «Արմենպրես»-ի փոխանցմամբ՝ կառավարության հեղինակած օրինագիծն Ազգային ժողովում ներկայացրեց ՀՀ շրջակա միջավայրի նախարարի տեղակալ Իրինա Ղափլանյանը:
«Առաջարկվող փոփոխություններով կկատարելագործվի բնապահպանական կրթության և դաստիարակության համակարգի օրենսդրական դաշտը` ՀՀ տնտեսական և կրթական բարեփոխումներին ներդաշնակ և «Կրթություն` հանուն կայուն զարգացման ռազմավարության» սկզբունքներին համահունչ՝ նպատակ ունենալով ուժեղացնելու բնապահպանական կրթության և դաստիարակության դերը»,- ասաց Ղափլանյանը:
Փոխնախարարը հավելել է, որ Հայաստանում մեծ նշանակություն է տրվում էկոլոգիական կրթությանը և դաստիարակությանը: Բնապահպանական ուղղվածության կոնվենցիաներով Հայաստանը ստանձնել է միջազգային պարտավորություններ, ինչպիսիք են` բնապահպանական հիմնախնդիրների և դրանց լուծման ուղիների վերաբերյալ հասարակության իրազեկության բարձրացումը, համապատասխան կադրերի պատրաստումը, վերապատրաստումը և էկոլոգիական կրթության խթանումը:
Նորայր Շողիկյան
Բաժանորդագրվեք մեր ալիքին Telegram-ում