Փաշինյանն անդրադարձավ «Ռաշն վոյաժ» ընկերության կողմից տրված կեղծ բանկային երաշխիքների գործին
ԵՐԵՎԱՆ, 27 ՄԱՅԻՍԻ, ԱՐՄԵՆՊՐԵՍ: ՀՀ վարչապետ Նիկոլ Փաշինյանը հայտնեց, որ «Ռաշն վոյաժ» ընկերության կողմից տրված կեղծ բանկային երաշխիքների գործն ուղարկվել է Ազգային անվտանգության ծառայություն և կարժանանա պատշաճ քննության: «Արմենպրես»-ի փոխանցմամբ՝ այս հարցին Փաշինյանն անդրադարձավ Ազգային ժողովում՝ պատասխանելով «Լուսավոր Հայաստան» խմբակցության անդամ Անի Սամսոնյանի հարցին:
Պատգամավորը հարցը հնչեցնելիս նշեց նաև, որ ընկերության տնօրենն ազգակցական կապ ունի վարչապետի կնքահոր՝ Հայկ Ղալումյանի հետ:
«Դեպքը բացահայտել է վարչապետի ենթակա մարմինը, գործերն ուղարկվել են ԱԱԾ ու որևէ կասկած չի կարող լինել, որ այդ գործը կարժանանա պատշաճ քննության: Հայաստանը փոքր երկիր է, շատ քիչ մարդիկ կան, որոնք կապերով իրար հետ կապված չեն»,- ասաց Փաշինյանը:
Մայիսի 18-ին «Երևանի ավագանու «Լույս» խմբակցության ղեկավար Դավիթ Խաժակյանը հրապարակային հայտարարություն է արել քաղաքապետարանի գնման գործընթացներին մասնակցող «Էտալոն գրուպ» ՓԲԸ-ի և «ՌԱՇՆ ՎՈՅԱԺ» ՍՊԸ-ի կողմից տրված կեղծ բանկային երաշխիքների վերաբերյալ:
Նորայր Շողիկյան
Բաժանորդագրվեք մեր ալիքին Telegram-ում