Գեղարքունիքցի շրջանավարտները միջնակարգ եւ հիմնական կրթության վկայականներ են ստանում
ԳԱՎԱՌ, 25 ՄԱՅԻՍԻ, ԱՐՄԵՆՊՐԵՍ: Գեղարքունիքի մարզային ենթակայության հանրակրթական հաստատություններում արդեն ընթանում են միջնակարգ եւ հիմնական կրթության վկայականների հանձնման արարողությունները:
Ինչպես «Արմենպրես»-ին տեղեկացրեց Գեղարքունիքի մարզպետարանի ԿՄՍ վարչության պետ Կարեն Զազյանը՝ մարզային ենթակայության հանրակրթական հաստատություններում նախատեսված է միջնակարգ կրթության ատեստատներ տրամադրել 1 220 շրջանավարտի, որոնցից 5-ը, սակայն, դրանք չեն ստանալու տեղափոխման, վերաքննություն հանձնելու եւ դասընթացը կրկնելու պատճառով: Հիմնական կրթության վկայական նախատեսված է հանձնել մարզային ենթակայության հանրակրթական հաստատությունների 2 470 աշակերտի: Մայիսի 25-ի դրությամբ արդեն բաշխվել է հիմնական դպրոցի 2 439 ավարտական վկայական : Դրանցից 227-ը հատուկ նմուշի են, իսկ մնացածը՝ սովորական:
«Գեղարքունիքի մարզպետի համապատասխան հանձնարարությամբ ատեստատների և վկայականների հանձնման արարողություններն ուղեկցվում են ՀՀ պարետի ցուցումների խստագույն պահպանմամբ: Չկան կուտակումներ, շրջանավարտների միջև ապահովվում է սոցիալական հեռավորությունը, նրանք կրում են դիմակներ և ձեռնոցներ, վկայական ստանալուց առաջ բուժքրոջ հսկողությամբ կատարվում է ձեռքերի ախտահանում: Իսկ այն դպրոցներում, որտեղ շրջանավարտների թիվը գերազանցում է նվազագույնը, սահմանված է վկայական ստանալու տարբեր ժամային գրաֆիկ»,- տեղեկացրեց մարզպետարանի ԿՄՍ վարչության պետ Կարեն Զազյանը:
Խոսրով Խլղաթյան
Բաժանորդագրվեք մեր ալիքին Telegram-ում