Շուրջ 190 երեխա վերադարձել է կենսաբանական ընտանիք. ինչպիսի վերահսկողություն է իրականացվում
ԵՐԵՎԱՆ, 7 ՄԱՅԻՍԻ, ԱՐՄԵՆՊՐԵՍ: Հայաստանում շուրջ 190 երեխա վերադարձել է իր կենսաբանական ընտանիք, այդ ընտանիքները ստանում են պետական աջակցություն: «Արմենպրես»-ի հաղորդմամբ` այս մասին ԱԺ-ում կառավարության 2019 թվականի ծրագրի կատարման ընթացքի և արդյունքների մասին զեկույցը ներկայացնելիս ասաց ՀՀ աշխատանքի և սոցիալական հարցերի նախարար Զարուհի Բաթոյանը:
«Հետևողական լինելով երեխաների մուտքը մանկատներ կանխարգելելու, նրանց ընտանիք վերադարձնելու հարցում՝ մի շարք միջոցառումներ են իրականացվել այս ուղղությամբ: Շուրջ 190 երեխա վերադարձել է կենսաբանական ընտանիք՝ շարունակելով պետական աջակցություն ստանալ: Դա ներառում է բնաիրային ապահովումը, կոմունալների փոխհատուցումը, նյութատեխնիկական աջակցությունը և այլն»,-ասաց Բաթոյանը:
Շարունակվում են աշխատանքները խնամատար ընտանիքների ինստիտուտի ձևավորման ուղղությամբ: Առաջին անգամ կազմակերպվել են խնամատար ծնող դառնալու ցանկություն ունեցող 25 անձանց համար վերապատրաստումներ: Գործողություններ են իրականացվել որդեգրման գործընթացում ապօրինությունների վերացման, երեխայի որդեգրման իրավունքի իրացման գործընթացի բարելավման ուղղությամբ:
«Լուսավոր Հայաստան» խմբակցության պատգամավոր Անի Սամսոնյանը հետաքրքրվեց, թե երեխաներին ընտանիք վերադարձնելու, գիշերօթիկների փակման ծրագրի արդյունքում հետո ի՞նչ վերահսկողություն է իրականացվում այդ երեխաների նկատմամբ, հաշվի առնվո՞ւմ են այն հոգեբանական պայմանները, որտեղ ապրում են նրանք:
Բաթոյանն արձագանքեց՝ իրականացվում են նաև այդ ընտանիքների ծնողներին աշխատանքի տեղավորման, նյութատեխնիկական աջակցության ծրագրեր: Այդ կարիքները գնահատվում են խնամակալության և հոգաբարձության մարմինների հետ համատեղ: «Բոլոր ընտանիքների կարիքները նախ գնահատվում են՝ հասկանալու, թե երեխայի վերադարձը կենսաբանական ընտանիք նպատակահարմա՞ր է, արդյոք, և անգամ ցածր ռիսկի դեպքում մենք, բնականաբար, չենք խրախուսում դա»,-ասաց նախարարը:
Նա կարևորեց համագործակցությունը համայնքների հետ, որտեղ ընտանիքները լավ են ճանաչում: Նրանց կողմից մոնիտորինգն ավելի արդյունավետ կլինի:
Աննա Գրիգորյան
Բաժանորդագրվեք մեր ալիքին Telegram-ում