Ժամանակը Երևանում՝ 11:07:36,   28 Մայիս

Սահմանափակումներով, բայց պրոֆեսիոնալ. Սիրիայում ՀՀ-ի հումանիտար խումբը շարունակում է առաքելությունը

Սահմանափակումներով, բայց պրոֆեսիոնալ. Սիրիայում ՀՀ-ի հումանիտար խումբը 
շարունակում է առաքելությունը
ԵՐԵՎԱՆ, 17 ԱՊՐԻԼԻ, ԱՐՄԵՆՊՐԵՍ: Սիրիայում Հայաստանի հումանիտար առաքելությունը կարճ ժամանակում գրանցել է բավական մեծ հաջողություններ: «Արմենպրես»-ի հետ զրույցում այս մասին նշել է Հալեպում ՀՀ գլխավոր հյուպատոսությունում հումանիտար առաքելություն իրականացնող խմբի ներկայացուցիչ Արկադի Տոնոյանը՝ ներկայացնելով հումանիտար խմբի աշխատանքները:
-Պարոն Տոնոյան, այս օրերին աշխարհի բազմաթիվ երկրներ տարբեր միջոցառումներով ու ծրագրերով պայքարում են կորոնավիրուսի տարածումը կանխելու համար: Սիրիան բացառություն չէ: Ասացեք խնդրեմ, Սիրիայի իշխանություններն ի՞նչ քայլեր են ձեռնարկում, ի՞նչ սահմանափակումներ են գործում: 
-Սիրիայում իշխանություններն իրականացնում են մի շարք կանխարգելիչ միջոցառումներ: Մասնավորապես, մարտի 16-ից հայտարարվել է արտակարգ դրություն, գործում են մի շարք սահմանափակումներ: Դադարեցվել է քաղաքային, նահանգային, ինչպես նաև միջնահանգային երթևեկությունը: Սահմանափակումների շրջանակում երեկոյան ժամը 18:00-ից մինչև առավոտյան 06:00-ն հայտարարված է պարետային ժամ, արգելված է մարդկանց տեղաշարժը: Հանգստյան օրերին տեղաշարժը սահմանափակված է կեսօրից՝ ժամը 12:00-ից մինչև առավոտյան 06:00-ն: Կցանկանայի առանձնացնել Առողջապահության նախարարության կողմից իրականացվող աշխատանքները: Մասնավորապես, նախարարության կողմից Դամասկոսի, Հալեպի, Լաթաքիայի, Հոմսի նահանգներում տեղակայված են լաբորատորիաներ, որտեղ հնարավոր է օրական մինչև 100 թեստավորում իրականացնել: Պատասխանատուները վստահեցնում են, որ այդ թիվը հնարավոր է հասցնել օրական 200-300-ի: Ինչպես նաև կրթության ոլորտի պատասխանատուների միջև ձեռքբերված պայմանավորվածության համաձայն Սիրիայի տարածքում 28 դպրոցներ կցվել են Առողջապահության նախարարությանը՝ հարկ եղած դեպքում ծառայելու որպես մեկուսարաններ: Սիրիայում նոր կորոնավիրուսով վարակվածների թիվը 30-ից ավելին է, որից բուժվել է 5-ը: Գրանցվել է մահացության 2 դեպք:    
-Նոր իրավիճակով պայմանավորված՝ ինչպե՞ս է կազմակերպվում մեր հումանիտար առաքելության աշխատանքը: Ի՞նչ կանխարգելիչ միջոցառումներ են իրականացվում վարակից խուսափելու համար: 
-Հայաստանի հումանիտար խումբն իր առաքելությունն իրականցնում է որոշակի սահմանափակումներով՝ հաշվի առնելով ստեղծված իրավիճակը: Կատարվում են անհրաժեշտ կանխարգելիչ միջոցառումներ հումանիտար խմբի աշխատանքները հավուր պատշաճի կազմակերպելու համար: Բոլոր ախտահանիչ միջոցառումներն իրականացվում են մարդասիրական կենտրոնում ամենօրյա ռեժիմով: Շաբաթվա ընթացքում երեք անգամ ընդհանուր ախտահանվում է անձնակազմի մշտական տեղակայման վայրը: Մարդասիրական խմբի անձնակազմը գործում է բավական պրոֆեսիոնալ, կատարում են կանխարգելիչ աշխատանքներ: Ընդգծեմ, որ մարդասիրական խմբում չկան առողջական խնդիրների հետ կապված դեպքեր: 
-Այս օրերին աշխարհի տարբեր վայրերում առավել ընդգծվում է բժիշկների, բուժանձնակազմի դերը, իսկ այդտեղ գտնվող մեր բժշկական խումբը բուժօգնություն է ցուցաբերում տեղաբնակներին: Ի՞նչ ուղղություններով են մեր մասնագետներն աշխատում: 
-Մեր մասնագետներն իրենց պարտականությունները կատարում են բավական պրոֆեսիոնալ և բարձր մակարդակով: Ստեղծված իրավիճակով պայմանավորված՝ հաճախումները հիմանականում քիչ են: Ամեն դեպքում մեր մասնագետները որոշակի սահմանափակումներում անգամ իրականցնում են իրենց առջև դրված խնդիրները: Նրանք ապահովված են պաշտպանիչ հանդերձանքներով ու ախտահանիչ միջոցներով: Դժվարություններով, սակայն պատվով իրականացնում են իրենց աշխատանքները: Մեր բժիշկները բազմապրոֆիլ ուղղություններով են սպասարկում՝ մանկաբուժություն, գինեկոլոգիա, վիրաբուժություն և այլն: Բոլոր ուղղություններով էլ ունենք գրանցած հաջողություններ: 
-Հումանիտար առաքելություն իրականացնող խումբը Հալեպի մի շարք բժշկական հաստատություններին վերջերս փոխանցեց բժշկական պարագաներ։ Ինչպե՞ս է կազմակերպվում աջակցության գործընթացը, ինչի՞ կարիք է զգացվում:
-Այո, մի քանի օր առաջ մեր մարդասիրական խմբի կողմից Հալեպի մի շարք բուժհաստատությունների տրվեցին դեղորայք, բժշկական պարագաներ: Հալեպում Հայաստանի Հանրապետության հյուպատոսության ջանքերով տեղի բժշկական հաստատությունների ու Հալեպ նահանգի առողջապահական պատասխանատուների հետ համատեղ իրակաանցվում են այդ աշխատանքները: Հանդիպումների ժամանակ տեղեկացվում են, թե ինչ բժշկական պարագաների կարիք ունեն: Սահմանված կարգով տեղեկատվությունը փոխանցվում է Հայաստանի իշխանություններին: Համապատասխան օժանդակությունը ստանալուց հետո այն բաշխվում է բժշկական հաստատությունների միջև:
-ՀՀ մարդասիրական առաքելություն իրականացնող խմբի 4-րդ հերթափոխն իր աշխատանքները կատարում է փետրվարից: Ինչպե՞ս կգնահատեք  այս հերթափոխի գործունեությունը, ի՞նչ արդյունքներ կառանձացնեք:
-Հումանիտար ականազերծման փորձագիտական կենտրոնի կազմում գործող մարդասիրական առաքելության ականզերծողներն ունեցել են բավական մեծ հաջողություններ այս կարճ ժամանակահատվածում: Պետք է նշեմ, որ 20 հազար քմ-ից ավելի տարածք է ականազերծվել այս կարճ ժամանակահատվածում: Հայտնաբերվել է մոտ 40 միավոր պատերազմի հետևանքով մնացած պայթուցիկ նյութեր: Դրանք բոլորը վնասազերծված են: Բժիշկների պարագայում էլ արդյունքները տպավորիչ են: Կարող ենք փաստել, որ Սիրիայում մեր առաքելությունն ընթանում է բնականոն հունով, նույնիսկ կորոնավիրուսով պայմանավորված այս օրերին ստեղծված դժվարին իրավիճակում աշխատանքները կատարվում են հավուր պատշաճի:  
-Տարբեր առիթներով նշվում է, որ մեր մասնագետները ջերմ հարաբերություններ են հաստատել թե՛ հայ համայնքի, թե՛ տեղի մյուս բնակիչների հետ: Ի՞նչ հետաքրքրիր դրվագներ կառանձնացնեք բնակիչների հետ շփումներից:
-Շատ ճիշտ նկատեցիք, ջերմ հարաբերություններ ունենք թե հայ համայնքի, թե տեղի մյուս բնակիչների հետ: Ասեմ, որ Հալեպում, ընդհանրապես Սիրիայում հայ համայնքն ունի բացարձակ հեղինակություն: Սիրիացիների շրջանում հայերն ունեն իրենց առանձնահատուկ տեղը՝ շնորհիվ իրենց վարքագծի, աշխատանքի, գործունեության, հոգեկերտվածքի: Մենք չէինք կարող զերծ մնալ այս պրոցեսից: Ուշադրությունը զգում ենք մշտապես: Այստեղ կան մարդիկ՝ թե հայեր, թե այլ ազգի ներկայացուցիչներ, ովքեր սովորել են Հայաստանում: Հենց սկզբից մեր մասնագետների հետ մտերմանալով՝ հիշում են իրենց դասախոսներին, կուրսընկերներին, կիսվում են հիշողություններով, ընդհանուր ծանոթներ են գտնում: Շատերը ցանկանում են կրկին գալ Հայաստան, մեծ հետաքրրություն են ցուցաբերել: 
Աննա Գզիրյան




https://zen.yandex.ru/id/5dee07a31e8e3f00ae3051c1


youtube

Բոլոր նորությունները    


New Xar

Գործակալության մասին

Հասցե՝ Հայաստան, 0002, Երեւան, Սարյան փող 22, Արմենպրես
Հեռ.՝ +374 11 539818
Էլ-փոստ՝ [email protected]
settings Էջի կարգավորումներ