Ոստիկանությունը պահակակետեր է տեղակայել 27 մեկուսացված վայրերում
ԵՐԵՎԱՆ, 6 ԱՊՐԻԼԻ, ԱՐՄԵՆՊՐԵՍ։ Վարակակիր անձանց հետ շփումները բացառելու նպատակով ոստիկանությունը պահակակետեր է տեղակայել 27 մեկուսացված վայրերում՝ հիվանդանոցներում և հյուրանոցներում, որտեղ պահվում են կորոնավիրուսով վարակվածներն ու նրանց հետ շփվածները։ Ինչպես տեղեկացնում է «Արմենպրես»-ը, ապրիլի 6-ի մամուլի ասուլիսի ժամանակ այս մասին ասաց փոխոստիկանապետ Հայկ Մհրյանը։
«Ճանապարհային ոստիկանության կարգախմբերի կողմից 2858 տրասնպորտային միջոցներից իջեցվել են երրորդ և ավելի անձինք, իսկ 69 ուղևորափոխադրում իրականացնող վարորդների նկատմամբ կազմվել է վարչական ակտ՝ ուղևորափոխադրման կանոնները խախտելու համար»,- ասաց Մհրյանը։
Փոխոստիկանապետը նշեց, որ այս պահին հանրապետությունում կա 69 հատուկ անցակետ՝ բնակչության ազատ տեղաշարժը սահմանափակելու համար։
«Մինչ օրս ոստիկանությունն արգելել է 3007 տրանսպորտային միջոցի մուտքը մի վարչական տարածքից մյուսը»,- նշեց Մհրյանը։
Ոստիկանության պետի տեղակալը նաև տեղեկացրեց, որ ոստիկանության բժշկական հոսպիտալն այս պահին ծառայում է որպես ինֆեկցիոն հիվանդանոց, որտեղ բուժվում է կորոնավիրուսով վարկված 83 անձ։
Հայաստանում ապրիլի 6-ի՝ ժամը 11:00-ի դրությամբ կորոնավիրուսի հաստատված դեպքերի ընդհանուր թիվը 833 է, արձանագրվել է մահվան 8 դեպք: Ապաքինվածների թիվը 62 է:
ՀՀ կառավարությունը Հայաստանում արտակարգ դրություն է հայտարարել: Արտակարգ դրությունը գործում է Հայաստանի Հանրապետության ամբողջ տարածքում 2020 թվականի մարտի 16-ից, ժամը 18:30-ից սկսած մինչև 2020 թվականի ապրիլի 14-ը, ժամը 17:00-ն: Երկրում գործում է խիստ սահմանափակումների ռեժիմ։
Բաժանորդագրվեք մեր ալիքին Telegram-ում