«Սբ. Գրիգոր Լուսավորիչ» ԲԿ-ի պոլիկլինիկան և ծննդատունը կշարունակեն իրենց բնականոն աշխատանքը
ԵՐԵՎԱՆ, 2 ԱՊՐԻԼԻ, ԱՐՄԵՆՊՐԵՍ: Հայաստանում «Սբ. Գրիգոր Լուսավորիչ» կենտրոնի պոլիկլինիկան և ծննդատունը կշարունակեն իրենց բնականոն աշխատանքը, կորոնավիրուսի դեմ պայքարի գործում կներգրավվի միայն ԲԿ-ի ստացիոնար մասնաշենքը: «Արմենպրես»-ի հաղորդմամբ՝ այս մասին ասուլիսում հայտնեց ՀՀ առողջապահության նախարար Արսեն Թորոսյանը:
«Բժշկական կենտրոնի ծննդատան մասնաշենքն ու պոլիկլինիկական մասնաշենքերը կշարունակեն իրենց բնականոն աշխատանքը: Դրանք միմյանցից բավականին հեռու են, և ստացիոնար մասնաշենքից որևէ վարակի ներթափանցման վտանգ չկա»,-ասաց նախարարը:
Նա նշեց նաև, որ կորոնավիրուսի դեմ պայքարի ծառայությունների շրջանակում լրիվ 0-ից այլ հիվանդանոցներ են մոբիլիզացվել և կադրերով, և սարքավորումներով, շատ արագ շինարարոթյուն է իրականացվել: «Պատերազմական տրամաբանությամբ ծավալվում է մի նոր առողջապահական համակարգ, որպեսզի հիմնական առողջապահական համակարգը շարունակի իր ծառայությունը մնացած այլ հիվանդություններով քաղաքացիներին»,-ասաց Թորոսյանը:
«Սբ. Գրիգոր Լուսավորիչ» բժշկական կենտրոնը վերապրոֆիլավորել է միայն կորոնավիրուսով պացիենտների բուժման համար։
Հայաստանում ապրիլի 2-ի՝ ժամը 11:00-ի դրությամբ կորոնավիրուսի հաստատված դեպքերի ընդհանուր թիվը 663 է, արձանագրվել է մահվան 4 դեպք: Հայաստանում ժամը 11:00-ի դրությամբ կորոնավիրուսից ապաքինվել է 33 քաղաքացի: Այս պահին փաստացի բուժում է ստանում 626 պացիենտ:
ՀՀ կառավարությունը Հայաստանում արտակարգ դրություն է հայտարարել: Արտակարգ դրությունը գործում է Հայաստանի Հանրապետության ամբողջ տարածքում 2020 թվականի մարտի 16-ից, ժամը 18:30-ից սկսած մինչև 2020 թվականի ապրիլի 14-ը, ժամը 17:00-ն: ՀՀ ամբողջ տարածքում սահմանափակված է մարդկանց ազատ տեղաշարժվելու իրավունքը:
Բաժանորդագրվեք մեր ալիքին Telegram-ում