ԵՐԵՎԱՆ, 31 ՄԱՐՏԻ, ԱՐՄԵՆՊՐԵՍ։ ՀՀ փոխվարչապետ, արտակարգ դրության պարետ Տիգրան Ավինյանի պնդմամբ՝ կորոնավիրուսով վարակված անձանց կոնտակտավորներներին հնարավորինս շուտ գտնելու նպատակով հեռախոսազանգերը ֆիքսելն այդ մարդկանց առողջության պահպանմանն ուղղված քայլ է։ «Արմենպրես»-ի հաղորմամբ՝ Ավինյանն այս մասին ասաց մամուլի ասուլիսի ժամանակ։

«Տեղաշարժի հետ կապված սահմանափակումները չեն կարող միշտ լինել, մենք միայն նպատակ ունենք շատ արդյունավետ կերպով արագորեն կանխորոշել և կանխարգելել հիվանդության տարածումը՝ հայտնաբերելով այն անձանց, ովքեր ունեցել են վարակակրի հետ շփում»,- նշեց ՀՀ արտակարգ դրության պարետը։

Նա նշեց, որ վարակակրի հեռախոսազանգերը ֆիքսելու դեպքում, երբ համակարգի միջոցով ավտոմատ կերպով ԱԻՆ աշխատակիցը կստանա մարդու եղած վայրերի և հեռախոսազանգերի տվյալներ, դրանց համադրությամբ տալու է ամենահավանական անձանց շրջանակը, ովքեր շփում են ունեցել նրա հետ։

«ԱԻՆ աշխատակիցը հերթականությամբ կզանգի այդ անձանց և հարցնի, արդյոք իրենք ունեցել են շփում վարակակրի հետ։ Այս քայլերն արվում է առաջին հերթին այդ մարդու առողջության ապահովման համար։ Մեզ չի հետաքրքրում խոսակցությունների բովանդակությունը, և թե ինչքան են դրանք տևել։ Մեզ պետք է մարդու տեղադիրքի և հեռախոսազանգերի տվյալների համադրումից ստանալ ամենահավանական անձանց շրջանակն, ովքեր շփում են ունեցել վարակակրի հետ»,- ընդգծեց Ավինյանը և հավալեց, որ նմանատիպ մեթոդներով, բարելավելով տեխնոլոգիական այդ լուծումները, հնարավոր կլինի անցում կատարել տեղաշարժի տոտալ սահմանափակումներից։

ՀՀ ազգային ժողովը մարտի 31-ին կայացած նիստի ժամանակ երկրորդ ընթերցմամբ չընդունեց կառավարության կողմից ներկայացված օրենքների նախագծների փաթեթը, որով կորոնավիրուսով վարակված անձանց կոնտակտավորներներին հնարավորինս շուտ գտնելու նպատակով առաջարկվում էր ֆիքսել հեռախոսազանգերի փաստը: ՀՀ կառավարությունը Հայաստանում արտակարգ դրություն հայտարարեց 2020 թվականի մարտի 16-ից, ժամը 18:30-ից սկսած մինչև 2020 թվականի ապրիլի 14-ը, ժամը 17:00-ն։ Մարտի 24-ի ժամը 23:59-ից մինչև մարտի 31-ը, ժամը 23:59-ն Հայաստանի ամբողջ տարածքում սահմանափակվել է մարդկանց ազատ տեղաշարժվելու իրավունքը: