ԳԱՎԱՌ, 31 ՄԱՐՏԻ, ԱՐՄԵՆՊՐԵՍ:  Գեղարքունիքի մարզի տնտեսություններում արդեն կատարվել է շուրջ 2 200 հեկտար գարնանացան:

Ինչպես «Արմենպրես»-ին տեղեկացրեց Գեղարքունիքի մարզպետարանի գյուղատնտեսության եւ բնապահպանության վարչության գյուղատնտեսության բաժնի վարիչ Մարտին Պետրոսյանը, գարնանացանը մարզում մեկնարկել է մարտի երրորդ տասնօրյակի ընթացքում: «Մոտ 1 000 հա գարնանացան արդեն կատարվել է Գեղամասար համայնքում, 300 հա՝ Մեծ Մասրիկում, 250 հա՝ Գավառում, 200 հա՝ Լիճքում, 100 հա՝ Շողակաթում, 20 հա՝ Ճամբարակում: Մնացած հեկտարները, արդեն քիչ ծավալներով, բաշխվում են այլ համայնքների վրա: Եղանակային պայմանները բարենպաստ են գարնանացանի համար, տեխնիկան եւ սերմացուն՝ բավարար: Ցանքն այժմ ընթանում է ցածրադիր գոտիներում: Հիմնականում ցանվում են գարի եւ բազմամյա խոտաբույսեր: Ապրիլ-մայիսի ընթացքում կկատարվի նաեւ կարտոֆիլի եւ բանջարբոստանային այլ մշակաբույսերի ցանք: Առանձին համայնքների տնտեսություններում փորձնական կարգով կմշակվի սիսեռ, ոլոռ, հնդկաձավար»,-նշեց Մարտին Պետրոսյանը:

Խոսրով Խլղաթյան