Դիլիջանի ոլորաններում հայտնաբերվել է ապօրինի փայտանյութ տեղափոխող երեք ավտոմեքենա. ԲԸՏ մարմին
ԵՐԵՎԱՆ, 27 ՄԱՐՏԻ, ԱՐՄԵՆՊՐԵՍ: Իջևան-Երևան ավտոճանապարհի Դիլիջանի ոլորանների անշարժ պահակակետում Բնապահպանության և ընդերքի տեսչական մարմնի Տավուշի տարածքային բաժնի և Ոստիկանության աշխատակիցների հետ համատեղ իրականացվող շուրջօրյա ծառայության ընթացքում մարտի 25-ին հայտնաբերվել է ապօրինի փայտանյութ տեղափոխող երեք ավտոտրանսպորտային միջոց՝ «Ֆորդ» մակնիշի 34PD981 պետհամարանիշներով ավտոմեքենան բարձված է եղել մոտ 2 խմ վառելափայտով, «ՎԱԶ 2107» մակնիշի 34PQ981 պետհամարանիշներով ավտոմեքենան՝ 50 պարկ փայտածուխով, իսկ Իջևան քաղաքի բնակիչ Պ.Ս.-ն «ԳԱԶ-3302» մակնիշի 99DD050 պետհամարանիշներով ավտոմեքենայով փորձել է տեղափոխել մոտ 2 խմ տախտակ և 570 կգ փայտածուխ:
Ինչպես «Արմենպրես»-ին տեղեկացրին Բնապահպանության և ընդերքի տեսչական մարմնից, բոլոր երեք տրանսպորտային միջոցները տեղափոխվել են Ոստիկանության Դիլիջանի հատուկ պահպանվող տարածք: Կատարվում է մասնագիտական ստուգում, հանգամանքները պարզվում են:
Բաժանորդագրվեք մեր ալիքին Telegram-ում