Կա թատրոն, կա կյանք. թատրոնի գործիչները չեն դադարում շնորհավորել միմյանց մասնագիտական տոնի առթիվ
ԵՐԵՎԱՆ, 27 ՄԱՐՏԻ, ԱՐՄԵՆՊՐԵՍ: Թատրոնի միջազգային օրվա կապակցությամբ թատերարվեստի ներկայացուցիչներն օրվա ընթացքում շարունակում են շնորհավորել միմյանց:
«Արմենպրես»-ի հաղորդմամբ՝ ՀՀ վաստակավոր արտիստ դերասան Վանիկ Մկրտչյանը «Ֆեյսբուք»-ի իր պաշտոնական էջում տոնի կապակցությամբ շնորհավորել է բոլոր թատրոնների իր սիրելի գործընկերներին՝ թատրոնի նվիրյալներին։ «Անբնական պայմաններում կանցնի այսօր մեզ համար այդքան կարևոր տոնը, քանի որ թատրոն և ինքնամեկուսացում բառերն իսկապես անհամատեղելի են։ Սակայն անհաղթահարելի չէ այս ճգնաժամը և հուսանք, որ շուտով նորից կհանդիպենք մեծ բեմերում»,-նշել է դերասանը:
Դերասան, ռեժիսոր «Բոհեմ» թատրոնի հիմնադիր Նարեկ Դուրյանը տեսաուղերձով է շնորհավորել Թատրոնի միջազգային օրը:
«Իմ սիրելի հանդիսատես, տիկնայք և պարոնայք, ժողովուրդ, ընկերներ, քույրեր, եղբայրներ, բոլորս գիտենք Շեքսպիրի այն հայտնի արտահայտությունը, որ կյանքն էլ թատրոն է: Շեքսպիրը մոռացել է շեշտել, որ կյանքը թատրոն է, որտեղ դերաբաշխումը ներկայացման ընթացքում է կատարվում, անսպասելի: Ավաղ, այս ներկայացման դերաբաշխումն այնքան էլ լավը չէ, բայց ոչինչ: Դուք հրաշալի հանդիսատես եք, մենք էլ, դե ոչինչ ռեժիսորներ, դերասաններ ենք: Վստահ եմ, որ շուտով նոր դերաբաշխում է լինելու, նորից հանդիպելու ենք թատրոնում, ուրախանալու ենք: Քանի դեռ կա թատրոնը, կա կյանքը և հակառակը»,-ասում է Դուրյանը, համբույրներ ուղարկում բոլորին և նոր հանդիպում խոստանում:
Դերասան ՀՀ վաստակավոր արտիստ Տիգրան Ներսիսյանն էլ գրել է. «Ու կբացվի վարագույրը, ու կհնչեն ծափերը, ու կսկսվի կյանքը: Շնորհավոր բոլոր մեր ընկերների, բոլոր թատերական գործիչների, իրական նվիրյալների, իսկական արտիստների, թատրոնի բոլոր մշակների այս նվիրական տոնը: Շնորհավոր տոնդ՝ թատրոն: Կա թատրոն, կա կյանք»:
Երևանի կամերային պետական թատրոնի տնօրեն, բեմադրիչ Լուսինե Երնջակյանը շնորհավորել է բոլորին և իր սիրելի ու հարազատ Կամերային թատրոնին: «Տարօրինակ զգացողություն է, երբ տոնը նշում ես տանը ու հնարավորություն չունես լինել թատրոնում, գործընկերների շրջապատում, իրադարձությունների կիզակետում: Իմ մտերիմները գիտեն, որ թատրոնն աշխարհում, լեզուս չի պտտվում ասել, բայց ամենակարևոր բաներից մեկն է: Ինչո՞ւ չի պտտվում, որովհետև թատրոնը մի ամբողջ տիեզերք է, ամենակարևոր տիեզերքն իմ կյանքում: Ես չեմ պատկերացնում ինձ առանց թատրոնի: Թվում է՝ ես այն ժառանգել եմ մայրական կաթի միջոցով կամ ավելի ճիշտ կլինի ասել հորս ծխախոտի ծխով: Որքան էլ վայրի հնչի, բայց հորս՝ Արա Երնջակյանին, թատրոնում պատկերացնելիս միշտ տեսնում եմ ծխախոտի ամպի մեջ»,-նշել է Լուսինե Երնջակյանը:
Նա մաղթել է հնարավորինս արագ ձերբազատվել համաճարակից, որպեսզի բոլորը հնարավորություն ունենան վերադառնալ իրենց փոքրիկ ուրախություններին:
Թատրոնի միջազգային օրն առաջին անգամ նշվել է Ֆրանսիայում, որից հետո տարածվել է ամբողջ աշխարհում: Այն տոնելու գաղափարը հաստատվել է Թատրոնի միջազգային ինստիտուտի (International Theatre Institute, ITI) որոշմամբ: Համաձայն կանոնադրության՝ այս կազմակերպության գործունեությունն ուղղված է ազգերի միջև բարեկամության և խաղաղության ամրապնդմանը, ինչպես նաև աշխարհի բոլոր թատերական խմբերի միջև համագործակցության ընդլայնմանը:
Լուսանկարները՝ դերասանների «Ֆեյսբուք»-ի էջերից
Բաժանորդագրվեք մեր ալիքին Telegram-ում