ԵՐԵՎԱՆ, 24 ՄԱՐՏԻ, ԱՐՄԵՆՊՐԵՍ: ՀՀ ԱԺ փոխնախագահ, «Իմ քայլը» խմբակցության պատգամավոր Ալեն Սիմոնյանն առաջարկում է Օտարերկրացիաների մասին օրենքում լրացում կատարելու մասին օրենքի նախագիծ, որով մասնավորապես հեշտացվում է օտարերկրացի պրոֆեսիոնալ մարզիկների` Հայաստանում աշխատանքային պայմանագիր կնքելու գործընթացը:  «Արմենպրես»-ի փոխանցմամբ` Սիմոնյանը նախագիծը ներկայացրեց ԱԺ մարտի 24-ի նիստում:

Սիմոնյանը նախ նշեց` ֆւտբոլային ակումբները չեն հասցնում օրենքով նախատեսված բյուրոկրատական ժամանակում պայմանագրեր կնքել ֆուտբոլիստների հետ և տրանսֆերի ժամանակահատվածն օգտագործել, որպեսզի ֆուտբոլիստների հրավիրեն` մեր ակումներում խաղալու համար: Նախագիծը մշակման սկզբնական տարբերակում ենթադրել է միայն ֆուտբոլիստներին վերաբերող օրենսդրական կարգավորում: Սակայն ԱԺ գլխադասային հանձնաժողովում քննարկելիս եկել են եզրակացության, որ կարելի է կիրառել բոլոր սպորտաձևերի ակումբների համար: «Այսպիսով,  ըստ էության առաջարկվում է հեշտացնել աշխատանքային պայմանագիր կնքելու հնարավորությունը այն օտարերկրացի մարզիկների համար, որոնք ունեն պրոֆեսիոնալ կարգավիճակ եւ միաժամանակ կնքում են մարզական գործունեության մասին պայմանագիր, այդ թվում նաեւ աշխատանքային պայմանագիր գործատուի հետ»,-ասաց Սիմոնյանը:

Միգրացիոն ծառայության պետ Արմեն Ղազարյանը ներկայացրեց կառավարության եզրակացությունը: Նա նշեց` նախագծով ըստ էության առաջարկվում է աշխատանքի թույլտվության պահանջից ազատել պրոֆեսիոնալ կարգավիճակ ունեցող օտարերկրացի մարզիկներին: Ղազարյանի խոսքով` կառավարության կողմից կատարված առաջարկներն ընդունվել և արտացոլվել են նախագծում: Նա նշեց` ըստ էության նպատակահարմար են համարում այս պահին առաջնորդվել առաջարկվող կարգավորմամբ: