Գավառի թիվ 2 միջնակարգ դպրոցի շենքի շինարարական աշխատանքներն ավարտին են մոտենում
ԳԱՎԱՌ, 24 ՄԱՐՏԻ, ԱՐՄԵՆՊՐԵՍ: Գեղարքունիքի մարզի Գավառ քաղաքի Հացառատ թաղամասի թիվ 2 միջնակարգ դպրոցի նորակառույց շենքի շինարարությունն ավարտված է մոտ ութսուն տոկոսով:
Ինչպես «Արմենպրես»-ին տեղեկացրեց շինարարական աշխատանքներն իրականացնող «Ագաթ-777» ՍՊԸ աշխղեկ Կոլյա Մարտիրոսյանը, դպրոցի շինարարությունը մեկնարկել է 2017 թվականի դեկտեմբերին եւ շահագործման պատրաստ կլինի 2020 թվականի ուսումնական տարվա սկզբին: Դպրոցը կառուցվում է նախկին վթարային շենքի տեղում, որը քանդվել է հիմքից: Շինարարության ընդհանուր արժեքը կազմում է 1 միլիարդ 380 միլիոն դրամ, որը հատկացվել է պետական միջոցներից:
«Մարտի 24-ի դրությամբ արդեն իրացված է հատկացված միջոցների մոտ ութսուն տոկոսը: Շինարարական աշխատանքներն ընթանում են ծրագրվածին համապատասխան, առանց խանգարող հանգամանքների: Հինգ մասնաշենքերից չորսի կառուցումն ավարտված է մնացել է երկրորդ մասնաշենքի ծածկի տեղադրումը: Այժմ ընթանում են շինմոնտաժային, ներքին հարդարման, արտաքին բարեկարգման աշխատանքներ: Շինարարության մեջ օգտագործել ենք մինչեւ 580 տոննա երկաթյա ամրաններ: Ամբողջությամբ պահովված է որակյալ շինարարություն: Չունենք ո´չ աշխատուժի, ո´չ մասնագետների, ո´չ շինանյութերի պակաս: Եթե աշխատանքները չդանդաղեն՝ պայմանավորված կորոնավիրուսի դեմ պայքարի միջոցառումներով, ապա կան բոլոր նախադրյալները, որպեսզի 525 աշակերի համար նախատեսված եւ արդի չափորոշիչներին համապատասխան դպրոցական շենքը շահագործման հանձնենք այս ուսումնական տարվա սկզբին»,-ներկայացրեց աշխղեկը:
Խոսրով Խլղաթյան
Բաժանորդագրվեք մեր ալիքին Telegram-ում