Դատավորների ընդհանուր ժողովը հետաձգվել է առողջապահական և կանխարգելիչ նկատառումներով
ԵՐԵՎԱՆ, 13 ՄԱՐՏԻ, ԱՐՄԵՆՊՐԵՍ: Դատավորների ընդհանուր ժողովը հետաձգվել է առողջապահական և կանխարգելիչ նկատառումներով, ինչպես նաև դատարաններից ստացված դիմումների հիման վրա:
«Արմենպրես»-ի հետ զրույցում՝ այս մասին ասաց ԲԴԽ աշխատակազմի մամուլի և հասարակայնության հետ կապերի ծառայության պետ Արման Խաչատրյանը։
«Այսօր կայանալիք դատավորների ընդհանուր ժողովը հետաձգվել է կորոնավիրուսի տարածման ու առողջապահական և կանխարգելիչ նկատառումներից ելնելով»,- նշեց Խաչատրյանը:
Նոր կորոնավիրուսի բռնկումը գրանցվել է 2019 թվականի դեկտեմբերի վերջին Կենտրոնական Չինաստանի ամենախտաբնակ քաղաքում՝ 12-միլիոնանոց Ուհանում: Առողջապահության համաշխարհային կազմակերպությունն աշխարհում տիրող իրավիճակից ելնելով պանդեմիա է հայտարարել: Աշխարհում կորոնավիրուսով վարակման դեպքերի թիվը հատել է 120 հազարի սահմանը: Վիրուսից մահացել է ավելի քան 4 500 մարդ:
Հայաստանում կորոնավիրուսի առաջին դեպքը հաստատվել է մարտի 1-ին, ևս 3 անձ հայտնաբերվել է մարտի 11-ին: Ընդհանուր առմամբ այս պահին 88 քաղաքացի, որոնք շփվել են կորոնավիրուսով վարակվածների հետ, մեկուսացված են:
Մարտի 12-ին հանրապետությունում հայտնաբերվել է ևս 2 կորոնավիրուսով վարակված անձ, որոնք Էջմիածին քաղաքի բնակիչներ են:
Բաժանորդագրվեք մեր ալիքին Telegram-ում