ԱԺ-ն քննարկեց բանկ ներկայանալու հնարավորություն չունեցող թոշակառուին թոշակից չզրկելու նախագիծը
ԵՐԵՎԱՆ, 3 ՄԱՐՏԻ, ԱՐՄԵՆՊՐԵՍ: ՀՀ Ազգային ժողովը երկրորդ ընթերցմամբ ընդունելու համար քննարկեց «Լուսավոր Հայաստան» խմբակցության կողմից ներկայացված «Պետական կենսաթոշակների մասին» ՀՀ օրենքում լրացում կատարելու մասին օրենքի նախագիծը, որով առաջարկվում է բանկ ներկայանալու հնարավորություն չունեցող կենսաթոշակառուին թոշակից չզրկել:
«Արմենպրես»-ի փոխանցմամբ՝ նախագիծը նիստում ներկայացրեց խմբակցության պատգամավոր Մանե Թանդիլյանը:
«Անկանխիկ եղանակով կենսաթոշակը ստանալու համար կենսաթոշակառուները պետք է վերջին 12 ամսվա ընթացքում ներկայանան բանկ: Սակայն կենսաթոշակառուների մոտ բանկ ներկայանալու հետ կապված բազմաթիվ խնդիրներ են առաջացել: Եվ այդ հարցով շատերին են դիմել: Մի լուծում ենք առաջարկել, որը նախատեսում է հեռահար եղանակով բանկի կողմից ինքնության հաստատման գործընթաց: Եվ առաջարկում ենք սահմանել, որ անկանխիկ եղանակով կենսաթոշակ ստացող կենսաթոշակառուի ՀՀ-ում լինելը բանկի կողմից կարող է հաստատվել նաև առանց կենսաթոշակառուի բանկ ներկայանալու կառավարության սահմանած կարգով»,-ասաց Թանդիլյանը:
Նա նշեց, որ գործող 17 բանկերից 4-ը նման ծառայություն արդեն իսկ մատուցում են, 2-ը դրանց մատուցումը կարգավորելու ընթացքի մեջ են:
Այսպիսով, նախագծի ընդունման պարագայում Հայաստանի Հանրապետությունում գտնվելու փաստը բանկի կողմից կարող է հաստատվել նաեւ առանց կենսաթոշակառուի բանկ ներկայանալու՝ կառավարության սահմանած կարգով: Կառավարության առաջարկով երկրորդ ընթերցմամբ քննարկմանը նախագծում արվել է ձևակերպման փոփոխություն, չի կատարվել բովանդակային փոփոխություն:
Նախագիծն առաջին ընթերցմամբ ընդունվել է ԱԺ հունվարի 23-ի նիստում:
Բաժանորդագրվեք մեր ալիքին Telegram-ում