ԵՐԵՎԱՆ, 27 ՓԵՏՐՎԱՐԻ, ԱՐՄԵՆՊՐԵՍ: ԱՄՆ-ում հրաձգություն Է տեղի ունեցել Միլուոքիի (Վիսկոնսինի նահանգ) Molson Coors գարեջրի ընկերության գրասենյակում: Սպանվել Է առնվազն հինգ մարդ: Ոստիկանությունը հայտնել Է, որ հարձակվողը՝ 51-ամյա տղամարդը, դատելով ըստ ամենայնի, ինքնասպան Է եղել, տեղեկացնում Է «Արմենպրես»-ը՝ հղում անելով BBC-ին:

Բոլոր սպանվածները Molson Coors-ի աշխատակիցներ են:

Միլուոքիի ոստիկանությունը հայտնել Է, որ իր աշխատակիցները գործ ունեն «վտանգավոր իրադրության» հետ եւ մարդկանց հորդորել Է հեռու մնալ այն շրջանից, որտեղ գտնվում Է գրասենյակային համալիրը: Հրաձգությունն սկսվել Է օրվա երկրորդ կեսին, երբ գրասենյակային համալիրում հարյուրավոր մարդիկ են եղել աշխատատեղերում: Molson Coors ընկերությանն են պատկանում գարեջրի Coors եւ Miller առեւտրանիշերը: Հարձակվողի դրդապատճառներն առայժմ պարզ չեն: Ֆրանս Պրես գործակալությունը, հղում անելով տեղական լրատվամիջոցներին, հայտնել Է, որ հրաձգությունն սկսել Է այն մարդը, ով այդ նույն օրը հեռացվել Է ընկերությունից: